Rai, Regjon e lenghe furlane: la limuesine no baste a cuvierzi lis vergognis

Ancje se la leç 482/99 e fevele avonde clâr in materie di tutele des lenghis mancul pandudis ancje sui mieç di comunicazion statâi, il furlan pe Rai al è simpri stât dûr di gloti. Une novitât impuartante dut câs e je vignude indevant cu la firme de gnove convenzion tra la Presidence dal Consei e la Rai, valide pal periodi 2013-2015, che e previôt che il Guvier talian al paiedi ducj i coscj industriâi de sede regjonâl dal Friûl Vignesie Julie. 5 milions di euros che a coventaran a cuvierzi la produzion interie di dutis lis trasmissions par talian e ancje di chês par sloven e par furlan. La cjame finanziarie pal Guvier e passe di 6,5 a 11, 6 milions di euros; ma in cheste suaze l’esecutîf al acete ancje di paiâ chei 200 mil euros che fin cumò la Rai e pretindeve de Regjon ogni an par fâ chês pocjis trasmissions radiofonichis in marilenghe (come “Vuê o fevelìn di…”) che di cumò indevant a jentraran tai ogjets de convenzion jenfri Guvier e Rai. ”O volìn viodi un biel segnâl inte totâl cuviertidure di bande de Presidence dal Consei dai coscj de sede RAI dal FVJ. O crôt che e puedi testemoneâ une gnove atenzion di bande dal Guvier viers la nestre realtât teritoriâl”, e à declarât la gnove presidente Debora Serracchiani daspò dal incuintri che e à vût a Rome cul diretôr gjenerâl de Rai Luigi Gubitosi. La presidente e cjante vitorie, visantsi ancje che la Aministrazion regjonâl dal Friûl Vignesie Julie e à grande atenzion pes trasmissions televisivis de nestre sede regjonâl, come la rubriche ‘EstOvest’. E la stiletade viers de Rai no mancje: “Viodût che cumò in Friûl la Rai e sparagnarà 5 milions di euros, o sperìn – e dîs Serracchiani – che chescj bêçs a puedin mudâsi intune plui grande valorizazion de sede dal FVJ, soredut sul plan de inovazion tecnologjiche” che e coventarès cetant ae emitent statâl, par miorâ sedi lis trasmissions sedi la ricezion tes zonis di mont de nestre regjon dai programs regjonâi di Rai3′.
Ma noaltris furlans vino di jessi contents e braurôs? Ce cambiaraial di cumò indevant? La Regjon e sparagnarà 200 mil euros: ma la presidente Serracchiani no dîs che intal acuardi negoziât dal assessôr Elio De Anna cul sotsegretari ae Presidence dal Consei Paolo Romani i 200 mil euros che il Guvier al varès metût a saressin stâts di meti no al puest, ma dongje di chei de Regjon par insiorâ l’ufierte in tiermins di numar e cualitât de informazion in marilenghe. Serracchiani invezit no à stanziât, a ce che al è dât savê, nancje un boro su cheste pueste di belanç intal assestament: e nancje pes emitentis privadis a son previodûts fonts.
E ce dî de Rai? A une emitent che e dopre 200 mil euros par fâ une sole trasmission par furlan e dome par radio, bisugnarès domandâi – se cualchidun al ves voie di rispuindi – se e je vere che ai gjornaliscj che a vegnin incjariâts di condusi e lavorâ in chestis trasmissions ur rivin si e no 25 mil euros in dut, ven a stâi pôc plui che i fruçons. E il rest? Dulà vadial a finî? In imprescj tecnics (?), in burocrazie? Ce coscj sono che a sglonfin cussì tant lis sumis che a vignivin domandadis ae Regjon? Cence vê rispuestis a chestis domandis facilis facilis o scugnaressin pensâ che cheste pueste di belanç che la Regjon e à destinât ae Rai no jere altri che un suplement di chel “canone” che zaromai i citadins furlans a pain ae Aziende di Stât cence viodi sigurâts i lôr dirits in tiermins di informazion inte lôr marilenghe.
Cence altris invistiments, in realtât, pal furlan in Rai la sensazion e je che al cambiarà pôc. E je vere che, come che al dîs William Cisilino, diretôr de Agjenzie Regjonâl pe Lenghe Furlane (ARLeF), “pe prime volte dopo 12 agns il Guvier al acete che la tutele e sedi un so dovê e al da aplicazion ae Leç 482”. Ma intant che a Rome si netin la cussience e a Triest si sfreolin lis mans pai bêçs sparagnâts, e reste une interie comunitât che e spiete di sintî un gjornâl radio o di viodi magari un tg in marilenghe. E dut chest al somee ancjemò une vore lontan, stant che la Rai di vuê ancje a nivel regjonâl e je dal dut sbelançade su Triest. Invezit, cui 200 mil euros de Regjon nol sarès stât impussibil inviâ la costituzion di une redazion gjornalistiche in lenghe furlane. Parcè che a vadin ben i programs culturâi, ma par dâ plene dignitât a une lenghe al covente doprâle par ducj i prodots de ativitât di comunicazion e di intratigniment che la radio, ma ancje la television, a ufrissin. “O sin la uniche gruesse minorance taliane – al amet Cisilino – che no à te emitence publiche une sô rapresentance gjornalistiche adate. Purpûr lis professionalitâts no mancjin. Al displâs che une ufierte che e ven preseade dal public no sedi tignude masse in cont de aziende di Stât”. Francês de Val di Aoste, todescs e ladins dal Sudtirôl, slovens in Friûl a àn canâi tematics e personâl preparât te lôr marilenghe. Par noaltris nol è ancjemò destin: ancje se il Consei di Europe al da indicazions une vore precisis su chest teme che al è un dirit par ducj i popui di Europe inte ete de informazion e de cognossince.
✒ Walter Tomada