Rai par furlan al fâs rime cun travai, ma ancje cun tramai. E l’inseriment de programazion in marilenghe te suaze de convenzion che e indrece il servizi public radiotelevisîf e je sedi un part dificil che un argagn plen di complicazions.
Colpe di chei altris, ma ancje colpe di noaltris: parcè che se e je vere che intun prin timp dome todescs, slovens, francês e ladins a vevin vude atenzion di bande dal Parlament, i sarts a son stâts bogns di pontâ i pîts, e invezit la rapresentance politiche furlane e à durmît. I sarts cussì a son sigûrs di vê une programazion dedicade, invezit i furlans a son tal dubi. A dî la veretât, il leghist Mario Pittoni, za membri de Comission di Vigjilance Rai cuant che al jere in Senât, ai prins di Mai al à anunziât che il furlan al sarès stât inserît intal oblic di programazion decretât dal art. 3, comma 1, lett. g de convenzion pai prossims 10 agns. Pittoni, che si segnale tant che il pari de norme che tal 2013 (sot la presidence Tarantola) e à puartât 90 oris di furlan in Rai, al dîs che «Il Consei dai ministris al à inzornât il test che al à mandât tant che parê ae comission di Vigjilance».
Chest al varès di jessi l’at che al segne lis diretivis rispiet al acuardi che la Rai e stipularà tai prossims mês cul Dipartiment Informazion e Editorie de Presidence dal Consei une volte rinovade la concession. Ma di Rome no je vignude nissune conferme, ancje parcè che cumò la Comission e à altris fastidis: lis dimissions dal diretôr gjenerâl Campo Dall’Orto a àn distaponât un vâs di Pandore dulà che il furlan al è considerât l’ultin dai problemis. Tocjarà duncje spietâ ancjemò, par vê sigurât un dirit che al varès di jessi scontât e invezit al somee simpri plui utopie.
Al torne di atualitât ce che al à dit il president de Assemblee de Comunitât Lenghistiche Diego Navarria cuant che a Març il furlan al jere stât taiât fûr dai oblics de Convenzion: «No podìn jessi come vâs di cret jenfri vâs di fier. I nestris rapresentants a àn di fâ sinti la vôs dai furlans». Se no, la Rai no fasarà mai sintî la vôs dal furlan… ❚
✒ Walter Tomada
