Puarte un amì a Volpares, pardabon!

Sul numar di Avost da La Patrie dal Friûl o vin cognossût un Stefano Montello in version contadin responsabil di un progjet sociosanitari de ASS 5 Basse Furlane: la fatorie sociâl Volpares di Palaçûl.
O vin ritignût di dâ man fuarte a cheste iniziative cun plasê e o vin acetât di partecipâ a une iniziative previodude par domenie ai 22 di Setembar propit li de fatorie sociâl.
Si trate di “Une fieste di fin Istât” al conte Montello “che e sarà la ocasion par vierzi lis puartis de fatorie a dute la int che in chestis setemanis nus à manifestadis solidarietât e simpatie, massime traviers de nestre pagjine Facebook: in passe 300 di lôr a àn za fracât sul LIKE de pagjine www.facebook.com/fattoriasocialevolpares”.
“Puarte un amì a Volpares, pardabon!” al è il non di cheste zornade di fieste inmaneade di Montello e dai utents de fatorie sociâl “Cumò al è il moment di cjalâsi tai voi e ringraziâ dutis lis istituzions e la int che nus stan dongje” al sclarìs il responsabil.
Si scomence aes 11 di buinore cu la dimostrazion di cemût che si trebiave une volte; aes 12.30 al sarà il gustâ li dal zardin de fatorie; aes 3 dopomisdì la redazion da La Patrie dal Friûl e presentarà l’ultin numar e par sierâ e sarà tante musiche cui FLK e Lino Straulino.
Un apontament che no si pues mancjâ no dome pes ativitâts programadis, ma soredut pe finalitât di sostegn a cheste impuartante realtât nassude par dâ une gnove ocasion di vite a chês personis che a son stadis afidadis a la struture. ❚
Christian Romanini