PRESENTAZIONS. Memoriis di Adrian

Al è zaromai di passe un an che inte Sale dal Consei provinciâl di Udin si presentin libris sul Friûl e par furlan: scuasit une flôr des gnovis publicazions intal cjamp. In Zenâr a son stâts protagoniscj doi libris de Kappa Vu.
Une biele gnove te editorie furlane: a son finalmentri saltadis fûr lis Memoriis di Adrian. No si fevele chi de version par furlan dal innomenât romanç di Marguerite Yourcenar, che almancul pal moment no esist, ma ben di Memoriis di politiche linguistiche, il volum scrit di Adrian Cescje e editât de Kappa Vu, che al è stât presentât martars ai 19 di Zenâr.
Dentri des sù par jù sîscent pagjinis de publicazion si cjatin passe cuarante agns di rivendicazions e di mobilitazions: storie, memorie, riflessions e indicazions validis ancje ore presint e pal avignî. Cescje al conte di se e di tancj altris di lôr, di tantis robis fatis e di cetantis che a coventaressin ancjemò a pro de lenghe furlane, dai furlans e dal Friûl. Tal libri si intiessin diari personâl e documentazion storiche e politiche e si incrosin il percors dal Moviment Friûl, chel de Associazion internazionâl pe difese des lenghis e des culturis menaçadis, lis bataiis pes leçs di tutele.
Dongje dal autôr, a àn fevelât dal libri ancje Silvana Schiavi Fachin, esperte di plurilinguisim e di didatiche des lenghis, il president de ARLeF, Lorenzo Fabbro, il segretari dal Moviment Friûl, Marco De Agostini, e il scritôr e sagjist Sergio Salvi. ❚ ✒ (M.S.)