Pre Checo Placerean e il Patriarcjât

“Po ben jo, fûr di cheste fede che o ai cumò pandude, che e je chê di Rome, di Alessandrie e de nestre Aquilee, e che a predicjin ancje in Jerusalem, ni che o ’nd ai vude, ni che o ’nd ai, ni che, in non di Crist, o ’nt varai une altre”.
◆ E je la conclusion dal simbul di fede de tradizion aquileiese, une des formulis plui antighis de glesie e che Rufin nus à tramandât.
In cheste conclusion si fâs une piçule liste di glesiis dal prin cristianisim. Ogni glesie e puartave lis sôs peculiaritâts, la sô organizazion, la sô sensibilitât e origjinalitât. E dutis unidis te stesse fede in Diu Pari, in Jesù Crist, tal Spiritussant, tal vanzeli.
Cul timp si formavin chestis glesiis patriarcjâls, che a deventavin centris propulsôrs de missionarietât che si slargjave in teritoris plui grancj.
◆ Vignint a Aquilee, si sa avonde (ma no masse!) de sô impuartance teologjiche, liturgjiche e ancje musicâl, tant che Cromazi al scrîf “O vin dât i nestris cjants ancje a Rome”. Cu la evangjelizazion, la metropolìe aquileiese e jere rivade in dute la Mitteleurope, di Como sù fin ae Donau e vie fin te Panonie.
◆ La sô fondazion marciane che si incuintre cu la grande tradizion orientâl dal apuestul Zuan, la sô impuartance organizative, i grancj teritoris che e veve evangjelizât, la nomine di vescui responsabii di gnovis comunitâts le faserin deventâ a ducj i efiets un Patriarcjât a pâr di altris.
◆ Il prin cristianisim al jere, duncje, une vore svariât di rîts, simbui, tradizions, cjants, organizazions. Ma tacant de Ete di Mieç e massime cul concili di Trent, la glesie catoliche si è simpri plui uniformade, cuntune sole cuarde che e sunave. E, di fat, ancje la liturgjie aquileiese e fo scancelade dal dut propit dopo di chel concili.
◆ Pre Checo, ispirantsi a cheste esperience gloriose e straordenarie di Aquilee, uniche in ocident dongje di Rome, al smicjave no di riproponi une teocrazie, un podê clericâl, come che tancj siei nemîs e denigradôrs a disevin, ma di recuperâ formis plui verglemadis di glesie, rispietosis des diversitâts culturâls, linguistichis, musicâls, teologjichis, organizativis, di rîts, di simbui. In cheste maniere, la glesie catoliche universâl, unide te stesse fede, tal stes Signôr, tal stes Spirt, tal stes batisim, e sarès stade tant plui siore cu lis ricjecis locâls.
Al è pûr vêr che ancje il Patriarcjât di Aquilee in sens politic, che al à funzionât dal 1077 al 1420, par pre Checo al jere une esperience ancjetant gloriose, no par meti il vescul sorestant de nestre regjon, ma par pretindi une plui fuarte autonomie aministrative pal Friûl di vuê.
◆ Imagjinâ une glesie plui sinodâl e mancul monarchiche, bramâ a nivel politic aministratîf plui autonomie e mancul centralisim burocratic, no mi somein visions medievâls, ma modernis. Par chel, pre Checo al jere un visionari e profete atuâl. ❚