Sfuei Mensîl Furlan Indipendent
Archivi de Patrie

I citadins europeans si movin a pro des minorancis

Marco Stolfo

Citadins europeans che a domandin di gnûf ae Europe di jessi “plui Europe” e “plui unide inte diversitât”. Al è il câs des entitâts associativis di diviersis comunitâts dal continent che si son dadis dongje cun chê di sburtâ la Union Europeane (UE) a indotâsi di struments normatîfs e operatîfs specifics a pro de promozion dai dirits, des lenghis e des culturis des minorancis presintis intai siei vincjesiet stâts membris. Par fâlu a àn sielzût di doprâ il strument de Iniziative dai Citadins Europeans (ICE), che cuntune cierte aprossimazion e corispuint a chê che tal Stât talian e je la propueste di leç di iniziative popolâr (le previôt l’articul 71, c. 2 de Costituzion) Si trate di un strument  e che al esist daûr di une norme dal Tratât di Lisbone, che e dîs che «citadins de Union, in numar di almancul un milion, che a vedin la citadinance di un numar significatîf di Stâts membris, a puedin cjapâ la iniziative di invidâ la Comission europeane, inte suaze des sôs competencis, a fâ indenant une propueste juste su materiis in merit che chescj citadins a calcolin necessari un at juridic de Union pai fins de atuazion dai tratâts».
◆ La ICE e je chê che e je stade inviade intal 2019 de bande des organizazions de minorance ongjarese in Romanie. L’intindiment declarât al è che de viertidure de bande de UE di une linie specifiche di belanç, inte suaze dai fonts pal disvilup regjonâl, che e sedi dedicade a chês comunitâts che a àn carateristichis specifichis linguistichis e culturâls, cun chê di promovi il disvilup socioeconomic in armonie cul ricognossiment e la promozion des particolaritâts rispetivis e cul esercizi dai dirits linguistics corispondents.
◆ In principi lis firmis a vevin di jessi tiradis dongje dentri dai 7 di Mai, ma stant che al jere dificil fâlu intant dal confinament par vie de pandemie, la Comission Europeane e a decidût di meti une altre scjadince, chê dai 7 di Novembar. Il soiâr dal milion di adesions al jere stât passât za in Mai, ma la massime part dai firmataris a son citadins de Romanie, de Ongjarie e de Slovachie e par che la ICE e puedi lâ indenant e covente che une cuote di firmis e vegni cjapade sù, midiant dal sît www.signiteurope.com, in ognidun dai Stâts membris e intun numar determinât almancul in siet Paîs.
◆ Tal moment di lâ in stampe, no savìn ancjemò se la Iniziative e varà sucès. Magari cussì no, fintremai al mês di Otubar, in diviersis zonis de Europe la campagne di promozion de ICE no jere stade ancjemò pardabon inviade. Cundut achel, là che si à vude une mobilitazion organizade i risultâts a àn tacât a viodisi. Par esempli intal Stât spagnûl, là che si son metudis in moviment vie pal ultin mês entitâts tant che la catalane Plataforma per la Llengua e il numar di firmis tiradis dongje al è cressût a fuart.
◆ La Vierte stade e veve cjapât posizion a so pro ancje la Aleance Libare Europeane (ALE-EFA), la famee politiche continentâl che e ten dongje la plui part dai partîts e dai moviments espression di nazionalitâts e minorancis, preseant i siei contignûts e i siei obietîfs, inte direzion di une unitât europeane efetive fondade su la partecipazion democratiche, sul pluralisim, su la solidarietât, sul autoguvier teritoriâl e sul ricognossiment de garanzie dai dirits fondamentâi.
◆ Intant e va dilunc su la sô strade une altre ICE a pro des minorancis. E je chê clamade “Minority Safepack”, promovude de FUEN (Union Federâl des Nazionalitâts de Europe) e poiade di passe un milion e dusinte firmis tiradis dongje tal 2018, che ai 15 di Otubar stâts e à fat un altri pas indenant, cu la audizion uficiâl dal so comitât organizadôr li dal Parlament European. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +