10 di Otubar: a 100 agns dal referendum popolâr in Carinzie

Come che o savìn, daspò de Prime Vuere Mondiâl i confins inte Mitteleurope a mudarin di bot. Ai 10 di Otubar dal 1920, i vignì domandât ae popolazion de Carinzie disot di sielzi, midiant di un referendum popolâr, se a volevin lâ cu la Jugoslavie o restâ cu la Austrie. Al vôt a pro di restâ cu la Austrie i vignì denant un fuarte bataie difensive.
◆ Ai 11 di Novembar dal 1918, daspò de sconfite de monarchie de Danau inte Prime Vuere, il guvier provisori de Carinzie al declarà la anession ae “Republiche de Austrie todescje”, che bielzà e bramave di fondisi cul Reich todesc. Il prin di Dicembar, il gnûf ream di Serbie, Cravuazie e Slovenie (SHS) al riclamave il possès dal teritori di lenghe slovene de Carinzie disot, che za al ocupave in part cu lis sôs trupis. Ai 5, il guvier carinzian al decidè di fâ front cu lis armis ai “invasôrs”, scomençant cussì la vuere difensive dai carinzians. Un daûr chel altri a forin tornâts a cjapâ lûcs impuartants sicu Orestagn, Ferlach e Grafenstein, fintant che ai 14 di Zenâr dal 1919 si rivà a un armistizi e sul teritori si insedià une comission americane (Miles Mission) par cirî di risolvi lis vieris cuistions.
◆ La prime propueste de comission e fo chê di marcâ il confin su la creste des Alps, ma chest no i plaseve ai slâfs, che cussì a tornarin a scombati, rivant fin a Clanfurt, che dut câs e fo subit liberade in graciis di un intervent dal consei superiôr dai aleâts. Par vie di dut chest, intal tratât di pâs di Saint Germain al fo decidût di fâ un referendum popolâr cu la int de Carinzie disot, ma lis bataiis di prime a vevin za fats 200 muarts e 800 ferîts jenfri i carinzians.
◆ Intant dal referendum, il teritori al fo dividût in dôs parts: une disot cu la aministrazion jugoslave e une disore, che e cjapave dentri Clanfurt e la rive meridionâl dal Wörtersee sot il control austriac. Il confin jenfri lis dôs zonis al coreve a soreli jevât di Vilac, traviers dal Wörtersee e pôc disot di Clanfurt.
Daspò di une propagande dispietade, ai 10 di Otubar dal 1920 si fasè il referendum, là che – a pet di une partecipazion dal 96% de int – il 59% si declarà a pro de permanence in Austrie, ancje se ben 18 comuns a votarin di chê altre bande.
◆ Pôc prime dal referendum il parlament carinzian al veve prometût che al varès prudelât la particolaritât linguistiche e nazionâl dai slovens no dome in chel moment storic, ma par simpri. In chê volte si pensà, seial di bande de popolazion seial di bande dai politics, che i passe 10.000 carinzians che a vevin votât a pro de Jugoslavie a fossin traditôrs de Carinzie. In dì di vuê, a cent agns di chei fats, si cîr di morestâ lis passions, cul ricognossi che chei che a vevin votât a pro de Jugoslavie a vevin dut il dirit di fâlu.
◆ Il President austriac Van Der Bellen al cjale cun favôr a chest 100n inovâl, e al dîs intune interviste che di là de viere linie di separazion al sta cressint un sintiment gnûf di partignince. Dut câs, al fo just tignî cont de opinion de int, massime par vie che in chei timps si veve une grande pôre su la pussibilitât che la Austrie e rivàs a tornâ a dâ di ca dal ribalton de vuere.
◆ Simpri pal President, al è fûr di discussion che par agnorums il rapuart cu la minorance slovene in Carinzie nol sedi stât masse plasint, ma in dì di vuê a son tancj i segnâi di distension e di rapuarts miôr in divignî, che si capìs ancje de presince di putropis scuelis bilengâls. Chestis scuelis lis àn bramadis sedi i todescs sedi i slovens e cumò tancj canais a vegnin biel a pueste de Slovenie in Carinzie par frecuentâlis.
◆ Chest an, pe prime volte inte storie, il president austriac e chel sloven a àn partecipât insiemi ae fieste pal centenari dal referendum, fat che al à dât di viodi un biel segn di viertidure.
Il President sloven Borut Pahor al dîs che al è un azart, ma che “il timp al mostrarà cetant coragjôs che o forin e se invezit cualchidun al fo credençon”. Cussì al disè intune interviste e al zontà di volê prudelâ lis minorancis todescjis in Slovenie, fevelant, tant che sloven che al viôt intai carinzians i siei conazionâi.
◆ Dal pont di viste european, o sperìn che si trati di une colaborazion sorenazionâl frutifare, che par altri e jere scomençade za cualchi an indaûr cu la creazion dal “Dreiländereck” e di ducj i progjets tri- e cuadrilengâi che si metin adun.
◆ A proposit: dai timps dal referendum, ai 10 di Otubar in Carinzie e je fieste regjonâl e duncje ducj i uficis publics e lis scuelis, ma ancje cetantis buteghis, a continuin a fâ fieste. ❚