Prate, il borc patriarchin martar de resistence furlane cuintri di Vignesie

I l borc patriarchin martar de resistence furlane cuintri di Vignesie no si lu cjate inte provincie di Udin, ma a soreli a mont. E cheste e je stade la sô storie: la ultime! La famee furlane dai Savorgnans – come che si sa – za di timp e veve palesât la sô fedeltât ae Serenissime, disvelant la sô disponibilitât a doprâ la spade par judâ la colade dal Patriarcjât filoimperiâl. Tal 1394, Tristan Savorgnan al veve copât a Udin il patriarcje Zuan di Moravie. Subit si jere movude la nobiltât furlane fedêl ae corone che e veve Cividât, in contrast cun Udin, tant che so pont di riferiment politic. Come simpri – e o speri che cumò al sedi clâr e palês – dut ce che al sucêt tes tieris dal Friûl al devente in curt une cuistion internazionâl, tirant dentri interès plui siôrs e slargjâts a nivel european. La dificile sucession di un Patriarcje sassinât si inserìs intun contest une vore complicât, piês ancjemò par vie dai ultins agns dal Schisme di Ocident (1377-1417); tal 1409 si cirarà dibant di dâi une fin cuntun Concili a Cividât ae presince dal antipape Gregori XII, al secul Angelo Correr, venezian. Di papis, in chel moment, a jerin adiriture trê, espressions di trê fazions diviersis de Glesie e orientâts su fronts contrariis. I lavôrs de assemblee a lerin a sbati, come che si pues imagjinâ, cuntun pês politic fuart intun clime za grivi, che al puartà ae deposizion di un patriarcje filovenezian, Antoni Pancera (1408), e ae fortune de jentrade dal so rivâl politic, Luduì di Teck. Chest nol jere dome de bande de corone imperiâl, ma al jere parint stret dal cont Fidrì di Ortenburg, un vassal potent dal Imperi che al tignive sot voli cui siei armâts dut il teritori des Alps orientâls, tignût sù dal re di Ongjarie Sigjismont, fradi dal imperadôr Venceslau e destinât ancje lui a deventâ imperadôr. Une situazion un grum delicade, che e faseve vignî i pinsîrs a Vignesie, come simpri golose di meti lis mans sul Friûl, soredut intun moment di confusion tant grande, politiche e istituzionâl. Chest al è il cuadri storic gjenerâl. E chi si poie la vicende peade a un biel borc dal Friûl di soreli a mont. Une citât che e puarte il non di un prât, e che devente no dome il simbul de resistence furlane cuintri Vignesie, ma ancje l’esempli di martueri orent che propit Vignesie e volarà dâ a ducj chei che si metevin cuintri di jê. Ma ve chi i fats. Ai 9 di Jugn dal 1419 Nicolau (o Nicolùs), cont di Prate, al veve vinçût i venezians a Banie, copant 200 oms e cjapant plui di 700 presonîrs, cul jutori di oms armâts mandâts de comunitât di San Denêl. Intant, i udinês a vevin cjapât cuatri fants venezians, ju vevin sbranâts cun ferocitât impirant i tocs su lis pichis che a vevin metût parsore dai spalts des muris de citât. Par ritorsion, trente furlans a forin decapitâts dai venezians, e vincj feminis, che a jerin stadis fatis presoniriis, a lerin incuintri al stes destin orent. Nol baste. Ai 11 di Lui la comunitât di Cividât, citât simbul dal schiriament filoimperiâl e une vore dongje de politiche dal patriarcje, si declare disponibile a tratâ cui venezians. La sbiraie, rinfuarçade di cheste decision, ai 14 di Avost a strenç in assedi Sacîl cun cuatri bombardis e a oblein la citât a rindisi. I fats si corin daûr l’un cun chel altri svelts: ai 21 di Avost i Siôrs di Purcie a tratin pe difese dal cjistiel; Vivian al ven concuistât e brusât, e il so cjistiel sdrumât dal dut, in mût di impedî aes trupis dai ongjarês di doprâlu come presidi di difese. Ai 23 di Avost e cole ancje Cjanive. Intal mieç di dutis chestis comunitâts che a pierdin o si rindin, chê di Prate e dimostre une capacitât di resistence fuarte e braurose de sô furlanetât, tant che ai 23 di Setembar lis trupis dal gjenerâl venezian Arcelli a vegnin fermadis de resistence eroiche di chest borc piçul ma combatîf, cul cjistiel difindût dal so siôr Nicolau e dal nevôt Vielm; dentri des muris e je ancje une compagnie di ongjars. Paladis di len tiradis sù pe ocasion e rinfuarcin il zîr de citât. Ma lis ploiis fuartis di chei dîs a permetin a une gruesse imbarcazion veneziane di fâsi dongje superant lis paladis e obleant Prate a rindisi. Salvâts i bens e lis personis, il lûc al ven parât jù par tiere e i siei siôrs obleâts al esili. La operazion plui crudêl e ancje emblematiche e fo chê di brusâ il grant e documentât archivi tignût cun cure di cheste Comunitât, un at gravissim che al voleve scancelâ dal dut une memorie di secui, organizade in pergamenis, cuaders, ats di nodârs, filzis di deliberazions, notis di spese, cronichis e testemoneancis che ore presint a saressin impuartantonis par rivâ a capî e a cognossi ce che o sin stâts e che no rivarin mai plui a savê. La memorie che e devente cinise, duncje: une operazion che e ven fate ogni volte che si pretint di cambiâ la storie, di tornâ a inventâ une narazion che no esist “ad usum imperii”, ven a stâi par rivâ a comandâ doprant l’arbitri dal podê che si maride simpri ben cu la ignorance dai popui. Mi plâs pensâ che Prate di Pordenon, come che si le cognòs inte sô forme uficiâl dai documents, e sedi stade l’esempli plui grant – ai siei timps – di une Resistence cuintri ogni forme di omologazion. No si è rindude. No si è pleade. Masse libare par rindi omaç ai gnûfs parons e à pluitost preferît jessi sdrumade dal dut. Miôr muarte che sclave. Cuissà mai ce che a varessin pensât, chei antenâts, di un progjet tant volgâr di italianizazion di Pordenon e dal so teritori! La storie che e vignarà dopo si le cognòs fin masse ben. Jenfri Zenâr e Fevrâr di chel an, il stes Luduì di Teck al bandone lis tieris dal Patriarcjât, no tant par scjampâ ma plui che altri par un ultin e disperât tentatîf di meti insiemi un gnûf esercit imperiâl e tornâ jù par parâ vie i venezians inte lagune. Ma lis trupis de Serenissime inte Primevere dal 1420 a rivin a rinfuarçâ lis concuistis e a vuadagnin la fedeltât di chei siôrs feudâi che a vevin simpri sostignût il Patriarcjât. E je la fin. Tristan Savorgnan al oten la rese di Udin ai 4 di Avrîl dal 1420, Vinars Sant, e doi mês dopo, ai 6 di Jugn, al fâs la sô jentrade trionfâl inte citât. La Patrie dal Friûl e jere colade in maniere definitive tes mans des venezians. Fûr che Prate, al vignarès di pensâ. Parcè che ti puedin fâ presonîr, slontanâ, esiliâ, adiriture copâ. Ma fin cuant che e reste libare la tô cussience, alore no tu sarâs mai un sudit. Ce biele lezion, no mo? Par ducj chei che si fruin i bregons a fuarce di inzenoglâsi devant dai lôr parons. ❚