Portâl multimediâl su la capitâl de X Regio Romane, fra fede, culture e memorie

Vinars ai 15 di Mai, li de Cjase dal Popul in vie Zorutti a Aquilee, Belka Media e à presentât il progjet multimediâl “AQVILEIA.it – Tra credo e storia”.
◆ La serade e à ufiert une anteprime dal portâl, cu la presentazion di contignûts storics e multimediâi, intervistis a studiôs e aprofondiments dedicâts ae storie e ae dimension spirituâl di Aquilee. Al è ancje stât proietât il trailer dal cine “Aquileia e i cristianesimi perduti”, che po al è stât presentât in prime assolude al festival èStoria di Gurize (ai 29 e ai 30 di Mai dal 2026). A son intervignûts Massimo Garlatti-Costa, Claudia Giordani, Romano Michelotti, Nevio Puntin e Elisabetta Ursella.
◆ Il progjet www.aqvileia.it al è stât finanziât de Regjon Autonome Friûl-Vignesie Julie – Assessorât ae Culture e al è stât realizât di Belka media cu la colaborazion di Raja Films e FriulUp, adun cui partners: Fondazion pe Conservazion de Basiliche di Aquilee, Glesie Furlane, Fondazion Aquilee, Grup Archeologjic Aquileiês, Comun di Aquilee e Parochie di Aquilee.
◆ “AQVILEIA.it – Tra credo e storia” e je un viaç ae scuvierte di une citât uniche, crosere tra Orient e Ocident, fondade intal 181 p.d.C. e deventade intal timp centri economic, militâr e spirituâl di prin plan. Aquilee si aferme tant che un dai lûcs là che il Cristianisim al cjape formis origjinâls, tra rituâi, simbui e tradizions che ancjemò vuê a stralusin dai mosaics de Basiliche e inte memorie dal Patriarcjât.
◆ Il portâl al met adun contignûts storics, intervistis e materiâi di aprofondiment, ufrint une narazion articolade tra fede e culture. Tes sôs pagjinis al è ancje il film “Aquileia e i cristianesimi perduti”, che al puarte sul schermi la pluralitât des vôs spirituâls che a àn animât la citât prime de afermazion di une sole dutrine. L’obietîf al è chel di deventâ un strument di riferiment par curiôs, apassionâts, studiôs e students, ufrint materiâi acessibii ma tal stes timp rigorôs, bogns par svicinâsi ae storie e ae complessitât culturâl e religjose di Aquilee. Il sît al dopre la grafie latine des iscrizions antighis, cul ûs de “V” tal puest de “U”, in riclam ae identitât romane e cristiane de Aquilee dai prins secui. ❚