Fabrizio Travisanutto, cuant che il mosaic furlan al concuiste il mont

Cemût nassie la realtât de vuestre aziende?
“La Travisanutto Mosaics SRL e je il risultât di un percors inviât e puartât indenant di gno pari, Giovanni, origjinari di Spilimberc.
Di frut, intai prins agns Cincuante, Giovanni al jere iscrit ae Scuele Mosaiciscj di Spilimberc, che in chê volte e jere l’unic istitût che al insegnave a praticâ un mistîr, preparant i siei arlêfs a lâ a lavorâ tal forest.
◆ Tant che student, i vignive domandât di fâ l’assistent di un insegnant, deventant po dopo insegnant lui stes.
Intal 1969 si è presentade une oportunitât: a New York, di fat, un ex arlêf de Scuele Mosaiciscj al gjestive un laboratori di mosaic, e al cirive un gnûf diretôr par chel; al è stât cussì che gno pari al à cjatât une gnove cjase in Americhe e dute la nestre famee si à trasferide là vie.
Tra il 1979 e il 1980, stant che il lavôr al jere cressût tant che i diretôrs dal laboratori no rivavin plui a fâ front a dutis lis domandis, o sin tornâts a Spilimberc, dulà che gno pari al à decidût di lâ indevant cul lavôr scomençât tal forest vierzint chi un so laboratori.
◆ La sielte di vierzilu propit a Spilimberc e je stade dal sigûr pesade ben: in chest paîs, di fat, al è facil cjatâ gnûfs colaboradôrs, parcè che a vegnin fûr de scuele di mosaiciscj chi dongje, e part dal materiâl che o doprìn al ven di Muran.
◆ Di chê volte la ativitât si è disvilupade e e je lade indevant, incressint il numar di colaboradôrs (che cumò a son plui di trente) e rivant a vê innomine e a tocjâ travuarts simpri plui alts.
◆ O calcoli che, vie pai agns, la nestre strade e sedi stade simpri premiade parcè che o vin metût simpri la cualitât al prin puest in ogni fase e aspiet dal nestri lavôr.”

_
Cemût si fasial il vuestri lavôr?
“Lis nestris oparis in mosaic a vegnin fatis dal dut cun materiâi talians e dentri dal laboratori stes in ognidune des fasis, po dopo lis mandìn ai nestris clients che a son pardabon in dut il mont. Il lavôr al ven fat cussì: in principi, o fevelìn cul client par capî ben lis sôs spietis su la opare e ce che al vûl viodi ae fin: nus baste vê un stampon de opare e cognossi lis misuris domandadis dal client, po dopo si interessìn de composizion de opare, di ordenâ i materiâi che a coventin e de sielte dal stîl artistic. ◆ Par ce che al tocje i nestris colaboradôrs, ju sielzìn cu la cure massime: dal moment che un student al finìs il percors scolastic ae Scuele Mosaiciscj, al scuen fâ cuatri/cinc agns par puartâ insom l’aprendiment in laboratori ca di nô. O din precedence di simpri a colaboradôrs intenzionâts a restâ in zone dopo finît il percors cun nô, in mût di podê garantî une continuitât ae colaborazion. ◆ Chest nus permet, di consecuence, di mantignî simpri chi la nestre produzion, continuant a calcolâ Spilimberc tant che il centri nevralgjic de nestre realtât particolâr: in fin dai fats, propit chi dute la nestre storie e à vût principi, e la culture dal mosaic e je centrade achì in sens storic. ◆ Chê dal mosaic e je une realtât di nicje, ma tant prestigjose, e o sin onorâts di contribuî a puartâle indenant fasint madressi gnûfs talents, distribuint oparis di cualitât massime e fasint cognossi a nivel globâl la unicitât dal talent furlan e ancje di une vere particolaritât culturâl de nestre regjon.”
_
Cualis oparis sêso daûr a progjetâ in chest moment?
“Cumò o stin sierant un progjet pardabon impuartant, che o sin daûr a puartâ indenant in Tailandie e che al à une storie che e je scomençade adiriture 160 agns indaûr. Il sovran di chê volte, re Rama V, al veve visitât i Museus Vaticans di Rome e al jere restât inmagât de tecniche dal micromosaic, al pont di disponi un lassit là che al esprimeve il desideri che la sale de incoronazion dai rês dal Templi Wat Ratchabophit di Bangkok (te foto) e vignìs insiorade di une opare fate cun chê tecniche.
Il re di cumò, Rama X, al à decidût di dâ vite a chest progjet e, cuasi cuatri agns indaûr, nus à selezionâts nô par realizâlu.
◆ E je la opare plui grande mai fate in micromosaic inte storie: il risultât finâl al sarà une opare fate di 12 panei che a àn domandât il lavôr di dîs a dodis personis par cuasi cuatri agns, e che a contaran la storie dal ream di re Rama V.” ❚