Al centri di un teritori vari
e di identitâts miscliçadis, la citât no merete
di jessi scliçade dal Tricolôr
Cjaminâ sul ôr di un confin al è simpri une esperience culturâl e umane profonde, parcè che al dimostre che une frontiere e pues simpri jessi gjeografiche, politiche, economiche, ma ancje e soredut culturâl e umane. Une dimension antropologjiche plui che no fisiche. Duncje une intersezion plene di sugjestions ricamadis in chê dimension dal dut particolâr là che lis diferencis si misclicin formant chê anime plurâl che e je il destin, par gno cont, dal jessi furlans. Il teritori che pal solit al ven definît “la destra Tagliamento” e che al cjape dentri une part impuartante di Friûl che pal solit o definìn di “soreli a mont”, e rapresente in chest sens un teritori interessant, dut di discuvierzi e di esplorâ, e ancje pôc cognossût e pôc praticât dai furlans che si identifichin cu la “Provincie di Udin”, o almancul ce che jere su la cjarte le “Provincie di Udin” cuant che lis provinciis a esistevin tant che ents aministratîfs sul teritori. Chei che masse dispès a pensin di vê cuasi la licence – e la prerogative! – par jessi definîts “furlans” tant di plui di ducj chei altris: dai cjargnei, dai gurizans, dai bisiacs, dai cjanalots (i abitants de Valcjanâl) e – juste apont – ancje dai “pordenonês”, che a abitin un spazi grant cuntune grande varietât di paisaçs sedi fisics che umans. Une aree cuntune diversitât enorme e une disomogjeneitât interne, che e passe des perifariis industriâls di Pordenon, nassudis ae fin dal Votcent par une vocazion di fabriche e di marcjât, aes comunitâts di mont, la part plui puare, sclete, scuindude e salvadie – e duncje ancje biele e uniche! – de nestre Tiere furlane. Des culinis di Pinçan fin aes pradariis umidis de plane che e sbrisse sul teritori dal Venit. Di Puart e di Siest in Silvis (che o calcolìn part dal Friûl storic!) fin ae Val Cimoliane. Condanât a jessi definît cun chê espression banâl e semplificative che masse dispès e ven doprade un pôc di ducj, ma cence vê une idee precise di ce che si trate, ven a stâi: “di là da la Aghe”, une etichete gjeneraliste, poiade li, cun masse disinvolture, cence mai pensâ che cheste e je une cundizion che e dipent dome di ce bande che si cjale: ducj o sin “di ca o di là da la Aghe”, par cualchidun che al cjape come pont di riferiment un flum grant e costitutîf de nestre identitât come il Tiliment. Une aghe che inte sô storie e à unît ma ancje dividût lis popolazions furlanis tant che un troi o un “as di simetrie”, poiât suntune mape par segnâ percors, paisaçs, confluencis, tradizions e influencis che a vignivin di lontan e che chi a àn pastanade la lôr lidrîs. Che e je ancje nestre. Une rie di division, insome, par storie, tradizion, costumancis, lengaçs, economie. E o podaressin lâ indevant. Si puedial definîlu furlan un di Sacîl? Plui o mancul di chei che a son a stâ a Cjanive? E ce culture si pandie sul altiplan dal Cansei, là che ore presint e cor une strade che inte cartografie dai nestri vons e vignive clamade “strata Patriarchorum”? Cuale ise la tradizion rituâl e cultuâl puartade indevant dal vescul di Concuardie rispiet a chê di Aquilee? Jerino sûrs, chês dôs glesiis li? O pûr “surlastris”? E di cuale mari? Domandis e interogatîfs che a sticin, e a sburtin a studiâ, aprofondî, cence mai rindisi a une semplificazion che e puarte simpri in direzions sbaliadis, parcè che a son masse scontadis o piês ancjemò “omogjeneizadis”, distiladis di cualchidun par che a sedin glotudis cun plui facilitât e, magari cussì no, cjapadis par buinis cence cirî di meti a fûc che Veretât che invezit si scuint simpri a une voglade superficiâl. Cuant che mi è stât proponût dai amîs de Patrie di inmaneâ cheste piçule rubriche propit par discori, sgarfâ fûr e contâ storiis e impressions su chel Friûl li, il “Friûl di Soreli a mont”, daspò di jessimi dedicât par tant timp aes tieris furlanis di “Soreli jevât”, o ai cjapade subit la idee come une biele sfide, e ancje come une gnove pussibilitât di pandi cussience di ce che o sin noaltris furlans: un arcipelac di tantis identitâts diferentis che si poin insiemi a formâ un mosaic cetant colorât e vivarôs. Complès, articolât, di straordenarie architeture e propit par chest di grant interès e simpri motîf di sorprese e di maravee. Dismenteâsi o, magari cussì no, pierdi ancje dome une tessare dal cuadri complessîf al sarès un grant pecjât. Al volarès dî cori il risi di jessi mancul siôrs di ce che o sin. E no feveli di bêçs, ma di cussience. Une operazion di chest gjenar e devente ancjemò plui impuartante in chescj mês che nus spartissin dal 2027. Un an che nol è butât li a câs, cuant che si fevele di chest teritori. Juste par madressi une vision critiche e bastiancontrarie – la uniche che nus plâs – in cont di ce che al sta bulint inte padiele de politiche culturâl dal Stât talian, simpri plui sostignude di ciertis fuarcis che chi di nô si identifichin cul tamon tignût ben salt dal Guvier centrâl a Rome. Mi riferìs ae candidature – aromai vinçude – di Pordenon tant che “Capitâl taliane de culture” propit pal 2027. Ma ce vuelial dî? Dal moment che pensâ mâl, come che al diseve chel, al è simpri sbaliât ma si intive simpri il bersai, mi soi domandât par cuâl motîf che al è stât sielzût propit Pordenon! Une citât che par storie, tradizion, culture e ancje ereditât e je simpri stade dut fûr che taliane. E che forsit, propit par cheste sô ereditât storiche e culturâl, si le presente simpri come la “mancul furlane” di dutis chês altris. Parcè? A cui i fasial comut? Ben, chest o cirarìn di indagâlu. Al ven di pensâ che cierts cognons di famee, tant frecuents inte tradizion politiche maioritarie dai nestris timps, e che a messedin insiemi nuie mancul che un onorevul intal Parlament dal Stât talian, un che al è bielzà stât sindic de Citât e che cumò al è ancje parlamentâr european, ducj e doi peâts a chê Diestre italiote e nazionaliste che o cognossìn ben e che dut e ten iniment fûr che la specialitât furlane, a puedin fâ la diference par sburtâ une candidature di cheste fate, no mo? Se il cognon al è simpri chel istès, e al è tant cognossût che nol covente nancje ricuardâlu, alore il dubi al devente cuasi une sigurece. E za si viodin al orizont svintulâ bandieris tricolôrs, glorificazion di gloriis militârs, relicuiis di romanitât e glorie risorzimentâl. Par rivâ, cence nancje inacuarzisi, ae esaltazion di chel “italico genio” che al puarte il non di firmis e di etichetis che a àn fate le storie de economie. Cence contâ la ereditât di Vignesie, no si discut! Invezit noaltris o larìn dute di une altre bande. Pal gust di nadâ cuintri curint. O ancje, e sperìn che e vadi propit cussì, par infastidî la Bestie! Par che no crodi di jessi libare di bati lis alis cence che nissun le cjapi a sclopetadis! ❚
