Poetis furlans in finâl al Premi “Guido Gozzano”: premiâts in trê su cuatri

Ben! Podìn dîlu cence pôre.
Come che us vevin anticipât intal numar di Setembar, a jerin cuatri i finaliscj di chenti (Giacomo Vit, Laurin Zuan Nardin, Luigina Lorenzini, Maurizio Mattiuzza), e su un numar di partecipants che in dut al è rivât scuasi a 1200 lavôrs, al sarès bielzà stât un bon risultât. Ma dopo de publicazion dai vincidôrs di bande de jurie, ben po, di chei cuatri a son stâts in trê a jessi premiâts, pandint la buine salût de poesie furlane.
Si scuen scomençâ de sezion B dal premi, dedicade aes poesiis ineditis par talian e par “dialet”.
Giacomo Vit, pordenonês di Cordovât, al à vût il plui alt ricognossiment e si è puartât cjase il prin premi, in gracie dal componiment “Ciassolis Sidinis” e nol è restât di bessôl, sul podi de sezion, parcè che tierce e je rivade Luigina Lorenzini, ancje jê a stâ tal pordenonês (a Vît) cu la poesie “Jò inveza eri denant dal mar”. Une sorte di dominance de poesie in lenghis minoritariis e dialets, jessint che il talian, in ducj i premiâts e segnalâts de sezion, scuasi nol comparìs.
E cetant encomi al va fat a Laurin Zuan Nardin che, inte sezion A dedicade ai libris di poesie za publicâts, e principâl di un concors rivât aromai ae sô XVI edizion, al à cjapât il secont premi, e al è stât il prin dai libris di poesie no par talian. Il so lavôr, “La carretta sfavillante – La briscje sflandorose”, editât de Gaspari editrice e jessût pochissim timp indaûr, al scomence in cheste maniere une vore ben la sô vite editoriâl, viodintsi ricognossude cuntun premi di valôr la ricercje dal poete sedi tal spirt uman, sedi dentri de lenghe furlane.
Si che duncje, lenghe furlane che di une bande si conferme “lenghe de poesie”, ma di chê altre e ven doprade di autôrs valevui tant che imprest par componiments di nivel elevât. ❚
Raffaele Serafini