PIRULIS DI MUSICHE. I sunôrs dal Friûl tal mont

La anime vibrante di Gustavo Zanin
no si dispiert
Codroipin doc, mestri organâr che come lui a ’nd è pôcs, se no nissun, unic. Un riferiment assolût tal cjamp de organologjie, a nivel mondiâl, fi di gjenerazions di costrutôrs di orghins, di une grande famee che e à tacât tal 1827, cun Valentino, la grande dite costrutore di Codroip glorie dal Friûl tal mont. Artesan, Cavalîr, Grant uficiâl dal ordin al merit de Republiche taliane, dotôr laurea honoris causa in Storie de art e Conservazion dai bens storics artistics. Al è Gustavo Zanin, che al à lassât la realtât terene ai 19 di Avrîl di chest an, a 91 agns, lui classe 1930. Simpri zovin, lavoradôr passionât, amì sensibil, simpatic, estrôs, galant, filosof, cul cûr grant e cu lis mans di demiurc. Dut votât ae musiche, ancje pianist passionât di jazz (e cui lu varessial mai dit), e – non plus ultra – inte art artesanâl de costruzion di struments musicâi liturgjics, catedrâls sunantis di bielece estetiche incredibile e cun sunôrs di cualitâts inimitabilis. A son cirche 400 i orghins che al à fat, fintremai durmintjur dentri, inte brame di finîju, e che a son sparniçâts in dut il Friûl, in Italie, in Europe e ancje in chei altris continents – come par esempli in Ecuador, te Americhe Meridionâl, o in Gjapon – conservâts in catedrâls, glesiis grandis e piçulis, auditoriums, concert halls, conservatoris, sedis privadis, dapardut.
◆ E je lungje la liste, e no vâl chi la pene sta a spiegâ trop che al è stât nomenât lui e dute la sô famee in libris e studis sientifics, no dome di storie locâl, ma internazionâl: une famee che di siet gjenerazions si inzegne inte costruzion di orghins. E cetant che al à fat par dute la comunitât furlane. Di zovin al è stât conseîr comunâl par un biel toc di timp, conseîr ae Cjamare di Cumierç di Udin, president di un consorzi regjonâl pal artesanât artistic, soci fondadôr e president de Pro Loco Vile Manin di Passarian e di cetancj altris ents di tutele e promozion sociâl e culturâl. Pluripremiât e ricognossût in variis circostancis. Tal 1995 al à ricevût la onoreficience di Grant Uficiâl de Republiche, il Paul Harris Fellow dal Rotary International, tal 2003 il titul di Prin mestri artesan de Regjon Friûl-Vignesie Julie, president onorari di Vile Manin, al à vût ancje il bon acet dal president Sergio Mattarella e no si pues no ricuardâ la amicizie cun Rudolf Nureyev, grant personaç de danze mondiâl, che al voleve puartâsi in cjase in Russie un so orghin. Realtâts, veretâts che a somein leiendis, parcè che Gustavo al è stât e al reste une figure lezendarie, un mît, un esempli pardabon esistût come che al dimostre dut ce che al à fat, imparât e insegnât. O ricuardi, tra lis tantis tabaiadis, cualchidune des sôs massimis, mots, precets che a son la misure dal so gjeni e dal so inzen di om, un esempli di no dismenteâ mai: «La robe plui dificil al è fâ lis robis facilis», «plui che o lin tal passât, plui o sin tal futûr». La tô esperience Gustavo, nus segne la vie juste di percori. No tu vignarâs mai dismenteât. ❚