PIRULIS DI MUSICHE. A Fors Disore, omaç a Giovanni Maria Anciuti

La cuinte edizion dal festival
che al puarte il so non
Al è dedicât al “Stradivari cjargnel dal oboe”, il fornês Giovanni Maria Anciuti, nassût a Fors Disore tal 1674 e muart a Milan tal 1744, il festival Anciuti, che al cjape propit il so non. Lui, il mestri costrutôr di struments a lenghete dople stimât in dute Europe, creadôr di manufats rafinâts che cumò a son conservât in impuartants museus europeans – tant che il Victoria and Albert Museum di Londre e il museu Sforzesc di Milan, che a custodissin ancje esemplârs dal so oboe speciâl in avoli, une raritât – al ven onorât e studiât graciis a cheste rassegne direzude di un pont di viste organizatîf dal oboist furlan Enrico Cossio e, par ce che al tocje l’aspiet artistic, di dal prin oboe solist de orchestre nazionâl di Sante Cecilie Paolo Pollastri.
◆ L’Anciuti al è un festival che al rive chest an ae sô cuinte edizion, e che si ten in forme simpri plui largje e inclusive. Dopo dai apontaments dai mês a pene passâts, in chest Avost, ai 4, inte frazion di Cele, al è protagonist il duet Anamorphoses, cul oboist e sassofonist Jonathan Mauch e Maxime Perrin ae armoniche. Ai 26 di Avost, aes 20.30 a Fors Disore, a sunin i francês Les Hautbois De Metz, direzûts di Serge Haerring; invezit, ai 27, inte glesie di Sante Mari Assunte si esibìs il grup strumentâl Le Petite Écurie. Inmò sore, dai 20 ai 22 al cjape il “la” il progjet “Reeds’n Kid”, un meeting internazionâl pai zovins apassionâts dai struments a lenghete dople: oboe e fagot. Un progjet destinât ae zoventût e che si ten te Anciuti Academy, dai 23 ai 28 di Avost: une masterclass di cjamare cui prins solist di orchestris impuartantis. Dutis lis informazions su anciutimusicfestival.it  ❚
A.S.