Pinot: par no fâ la fin dal Tocai

“La pôre plui gruesse e je chê di jessi glotûts dal Venit e di pierdi un altre bandiere de nestre vitiviniculture”. Al è clâr e sclet Valneo Livon, il titolâr de omonime cantine di vins di Dolegnan, Cuei orientâi dal Friûl, contant de gnove bataie sclopade tal mont dai vins furlans, ven a stâi chê dal Pinot grîs. Propit par chest, insiemi a une schirie di siei coleghis roncârs a àn decidût, a pene savût dal progjet di creâ une DOC uniche clamade “delle Venezie”, di costituî un Comitât pe difese dal vin furlan, in maniere di podê vê vôs in cjapitul devant de Regjon che e stave lant vie drete come un sivilot par sotscrivi l’acuardi cui cusins di là de Livence.
“Intes setemanis passadis, si sin cjatâts a cuatri voi tra noaltris produtôrs – al conte Livon – e dopo la pagjine che o vevin comprât tal Messaggero Veneto, o vin concuardât di inmaneâ chest grup devant dal nodâr. Cu la mê aziende o sin in vot fondadôrs (Livon, Jermann, Volpe Pasini, Schioppetto, Ronco del Gelso, Teresa Raiz, Di Lenardo e Comelli), ma cun dutis lis aziendis che a àn za manifestade la volontât di aderî o rivarìn a plui di cuarante, cence dismenteâsi di une cuindisine di enotecnics dal teritori”. Un prin risultât lu àn otignût: a son rivâts a frenâ la tratative che in Març, in ocasion di Vinitaly a Verone, i venits a davin bielzà par fate. Par lôr, di fat, e larès une cane vê dut il Nordest unît te comercializazion dal Pinot grîs (tresinte milions di butiliis l’an, vendudis massime tai Stâts Unîts, in Gjermanie e Ingletiere): a disin che al sarès indispensabil par evitâ imitazions e dispreseaments.
Secont invezit i roncârs furlans, chest dissen al puartarès ae scancelazion di dutis lis storichis IGT da nestre regjon, metint a risi po dopo ancje la esistence des denominazions a origjin controlade, lis DOC propit dal Pinot grîs (Cuei, Cuei Orientâi, Anie, Aquilee, Gravis, Lusinç, Tisane), une varietât che e pese il 25 par cent di dut il teritori regjonâl coltivât a vignis (4.750 etars totâi).
“La nestre preocupazion e je chê di no jessi tignûts in considerazion – al specifiche Livon – parcè che al è clâr che cui numars che a podin zuiâ in Venit il nestri pês al sparìs, cussì come la nestre storie, la nestre culture, la nestre identitât. E che no vegnin a dînus che cheste operazion e covente par vendi di plui. Il Pinot Grîs furlan al pues vantâ un otim marcjât”. I roncârs furlans si domandin il sens di leâ une Doc che di simpri e je sinonim di cualitât e presi superiôr a un vin che za in partence al cor daûr al presi plui bas e ae massime semplicitât dal gust. E soredut, no capissin ce mût che une Doc assoludementri no omogjenie par terens e clime, e puedi rivâ a superâ la aprovazion dal comitât nazionâl des Doc. Bisugne tignî cont, cun di plui, che si larès a pierdi la IGT de Vignesie Julie, butant vie agnorums di lavôr dai professioniscj de zone, e po dopo al  tocjarès aumentâ lis produzions, danezant la cualitât. “Tra l’altri – al met in vuardie Livon – prime di vierzi cualsisei discors, o vin prime di dut di rivâ a costituî la Doc uniche dal Friûl. O sin daûr a fevelânt di cuatri agns in ca, ma nol è ancjemò saltât fûr di concret. Cun chest comitât che o vin inmaneât, o cirarìn di difindisi e di difindi il bon non dal Pinot grîs de nestre tiere, cuintri cui che al volarà fâsi fuarce politiche su pes nestris spalis”.
Se no vignaran scoltâts, che si preparin a ricevi une schirie di ricors. ❚
David Zanirato