Sfuei Mensîl Furlan Indipendent
Archivi de Patrie

Piltrude, la principesse langobarde che e à fat nassi la vite monastiche di chenti

Agnul Floramo
PILTRUDE E ERFON, FRESC INTE BADIE DI SIEST

Cjargne, tiere ruspiose. Crets, boscs, fadie. Resistence, braùre. Ma ancje risorse di chê Utopie che par solit si scuint là che nancje no tu ti impensis di lâ a cirîle. E si tache adore, in cheste nestre storiute di “Cjargnelas”, feminis che a àn dispès dimostrât di vê anime, cûr e mans compagns ae lôr tane. I documents de Ete di Mieç a son cetant siôrs di informazions su la vite che si menave di chestis bandis. Une des cjartis plui antighis e curiosis e conte de figure di Piltrude, principesse Langobarde, femine di Pieri, duche dal Friûl, e mari di chei trê innomenâts Erfo, Anto e Marco, che intal 762 a donarin un toc di tiere aes muiniis di San Benedet. La donazion le faserin par che a tirassin sù la maraveose badie di Siest in Silvis, la plui antighe de Patrie, che ancje in dì di vuê e rapresente un spetacul di bielece, sedi pai frescs sui siei mûrs che pes architeturis di piere che ju conservin. Restade vedue, Piltrude e fo mandade intun piçul clostri in chel di Saltus, dongje di Udin, vuê Salt di Paulêt. Une biele pensade par fâ in maniere che no torni a maridâsi, dispierdint il patrimoni. Anime di grande profondidat, Piltrude, che e veve cognossude la glorie e la potence de sô cundizion di duchesse, ma che no si rint ae malinconie, pluitost e tache a progjetâ une vite gnove e plene di intensitât. La altece de sô dignitât le puartà a deventâ in curt badesse. E chest le à judade a indreçâ la vite e la opare des sôs muiniis, fasint cjapâ fuarce ae Regule benedetine propit inte cumbinazion dai siei doi precets: ora et labora. Preâ nol è avonde, bisugne ancje fâ! Mi pâr che al sedi un principi che si seste ben inte indole dai furlans. E cussì il piçul munistîr feminin di Saltus al tache a bruscjâ la tiere dulintor, cuvierte di arbui e di baraçs (Saltus par latin al vûl propit dî “bosc”, regjon no coltade, pustote), par trasformâle intun piçul Paradîs di orts e di prâts, di cjamps e di tavielis, braidis e bearçs. Ma nol jere avonde. La antighe capitâl dal Ducât Langobart, Cividât, e tacave a vivi une stagjon di decjadence fuarte. Li di cualchi an al sarès rivât un altri Popul, chel dai Francs, cuntun altri re, Carli di Heristal, plui tart cognossût come “il Grant”. E il duche al sarès deventât marchês. Insome, chê che si clamarès une “ete di grandis trasformazions”. La puare int, i biâts, i pitocs, a son simpri chei che a sopuartin il pês plui grant di ogni cambiament. E se inte campagne alc par vivi si cjate, la citât e devente un lûc di patiments, di isolament e di disperazion. Bandis di mendics a ziravin domandant alc di mangjâ; lis maris a tignivin i lôr fruts peâts tal cuel, cence lât di dâur, savint che il prin frêt de stagjon ju varès puartâts vie come che la buere e fâs cu lis fueis dal Autun. Piltrude si sint ancjemò une privilegjade. La vite monastiche e je crude e severe, ma ti regale ancje la pâs de anime e la sigurece dal cuarp. I magazens si jemplin di grans, lis cantinis di vin, i camarins di formadis. Sigûr no si mûr di fam. Lis peraulis dal Vanzeli, par Piltrude, a son duris come un clap: “O vevi fam e mi vês dât di mangjâ; o vevi sêt e mi vês dât di bevi”. E cussì, la Langobarde e cîr dulinvie, e domande, e brighe, e pense. Ae fin e cjate une soluzion. In graciis dal podê dal so non – e je simpri la spose dal duche! – e cu la fuarce che i rive de posizion di badesse, e compre un prât in Cjargne, intal Cjanâl di Sant Canzian, dulinvie dal Cjanâl Pedarç. Sgarfe sot Canzian e tu cjatis antighis comunitâts di slâfs, che di fat si jerin insedâts là sù vignint dal Carantan. A vevin puartât li lis lôr tradizions e usancis. Fra chestis la “Zadruga”, come che lôr a definivin la comunitât dal vilaç. Al è un non interessant, parcè che voltât par furlan al sune come “Par chei altris”, intindint la Comunitât come une forme di autosussistence e di jutori di un cun chel altri. Insome, al jere il puest just par tacâ une imprese che, partint de economie, e cjalave a une gnove vision de Societât – rivoluzionarie ancje pai nestris timps! –, là che i puars a vevin di jessi calcolâts al centri di dut. Il pascul al varès nudrît un trop di pioris vie pe stagjon cjalde. Facil che a vignissin menadis par cjamâ la mont vie par chel troi che pre Gjelmo Biasut al clamave “il troi pe Cjargne”, che dal Arzin al montave sù fin a Enemonç. Pensâ che Piltrude, dentri de solitudin claustrâl, e ves imagjinât dut chest, al somee un miracul. Ma si sa che la semence di un miracul e tache propit dal piçul. Come che al diseve chel rivoluzionari palestinês, adotât di un puar marangon e di “pari” malsigûr: “La piere scartade dal architet e je deventade clapon di scuare”. Insome Piltrude e veve capît che di une economie agrosilvopastorâl, come che si disarès in dì di vuê, si pues gjavâ fûr un circul virtuôs: di là sù al rivave a Salt un piçul tesaur fat di formadi, scuete, foncs, pomis di bosc, ma soredut lane. Tante lane che lis mans des muiniis a varessin trasformade in cuviertis, mantelinis, maiis e braghessis di regalâ ai puars di Cividât. Il frêt e la fam no saressin plui stâts un probleme, a bon pro di chê mari slontanade dai fîs par no “sporcjâ” il sanc de dissendence. E la int, là sù, intal cjanâl in Cjargne, e varès tacât a clamâ chel prât comprât dal clostri di Saltus il “Prât da las Dumblas”, che sedi tal furlan antîc che tal cjargnel di vuê al vûl dî il “Prât da lis Feminis”. E chês feminis a saressin propit lis muiniis, e prime di dutis Piltrude, che e veve vude la idee. Ore presint il toponim al è inmò vîf: al è chel Pradumbli, intal Cjanâl Pedarç, che inte storie al varès mantignude la sô anime resistenziâl e bastiancontrarie. Unic paîs tirât sù là che il soreli nol bat. Se tu ur domandis ai paisans il parcè, ti rispuindin: “Ce vevino di fâ, come ducj chei altris?”. Tiere di anarchics, rivoluzionaris, e utopiscj che a àn simpri sperât di cambiâ il mont tacant des ideis piçulis. Le contarìn, la lôr storie, intun altri moment. Un fat al è chel dal funerâl anarchic celebrât a Pierie intal 1933 par volontât di une femine, la Paluçane; e po dopo o fevelarìn des partigjanis cjargnelis che intal 1944, adun cui lôr oms, a fondarin e a difinderin la Republiche Libare de Cjargne, pretindint di votâ, come i oms, parcè che come lôr a lavoravin, a scombatevin e a murivin. Insome, une grande dimostrazion di libertât e di indipendence. Un spirt autonomist. E Piltrude? No si sa nancje dulà che e je stade sepulide, ancje se la tradizion e vûl che il so sepulcri al sedi chê arcje di marmul che e je inte cripte dal munistîr di Sante Marie in Val, a Cividât. Al varès di deventà un lûc di pelegrinaç par ducj chei che a crodin ancjemò che il Mont, par trop brut che al sedi, bisugne savoltâlu. Magari tacant propit di un Prât! ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +