Sfuei Mensîl Furlan Indipendent
Archivi de Patrie

Lezionari sì Messâl no

Tonin Cjapielâr

La gnove de mancjade aprovazion dal Messâl e je stade par me e pai Furlans un colp mortâl. La date dai 15 di Novembar dal 2023 e restarà ben fissade tes nestris memoriis ancje parcè che e je rivade dopo sessante agns di proclamis dai vescui e dal magjisteri roman sui dirits des minorancis. In plui, chest fat al reste un spieli dal tradiment dal spirt dai paris conciliârs dal Concili Vatican II, sierât tal lontan 1965. O soi restât e o continui a restâ no dîs avilît o cence fiducie, ma deludût e tal marum se o pensi ae Conference Episcopâl Taliane.
◆ Pe messe o lin indenant vint il Lezionari, une racuelte di lezions de peraule di Diu, e cussì par consolâmi o soi lât a vierzi chel libri che al è stât presentât in diocesi ai 31 di Març dal 2001. O ricuardi ancjemò: e je stade par ducj noaltris, soredut di Glesie Furlane, une grande zornade.
◆ Il Lezionari al meteve in prime pagjine la scrite “lingua forojuliensi exaratum”: il furlan al vignive declarât lenghe liturgjiche e al jentrave a dirit plen fra lis 344 lenghis dal mont ricognossudis pal cult catolic. Cun di plui, al veve la vidimazion dal gard. Estévez, prefet de Congregazion pal Cult: une robonone par noaltris che no sin usâts a svolâ tant ad alt.
◆ Pe ocasion de presentazion, la Vita Cattolica e meteve in prime pagjine la fotografie dal vescul bons. Brollo cul lezionari strent tes mans e la scrite in grant: “La marilenghe in tutte le chiese”. L’editoriâl al jere, e lu veve mertât, di Duili Cuargnâl.
Pe ocasion al vignive di Rome l’arcivescul bons. Pio Francesco Tamburrino, segretari de Congregazion pal cult e pe dissipline dai Sacraments. La lezion magjistrâl e jere tignude di Arij Crollius, professôr universitari e perît su argoments di fede, culture e globalizazion. La Vita Cattolica e meteve ancje i nons dai membris de Comission diocesane pe traduzion dai tescj liturgjics e e ricuardave ducj chei che a vevin lavorât par rivâ al Lezionari.
◆ Par me, a podevin cjatâ un cjantonut di pueste par pre Antoni Beline. Di fat, il Lezionari lu vin prime di dut in graciis de sô passion e dai siei sudôrs, dome che pre Antoni si lu laude cuant che si scuen e al conven, ma no si intrighisi nancje vuê tes bataiis che lui al à fat. No podìn dismenteâ che pe sô passion pal Friûl, pre Antoni si lu cjatave a vaî come un scoreât; altris voltis, tes polemichis, al sparive come i partigjans tal bosc o si ritirave in preiere sul cjast de canoniche li che al veve un altarut e li che, ancje cjantant, al invocave a judâlu ducj i sants dal paradîs.
Vuê o podìn ben dî: la aprovazion dal Lezionari e je stade un biel moment, une grande sflamiade ancje se e à durât pôc; di fat tes “Vitis catolichis” dal mês di Avrîl za il Lezionari nol esisteve plui.
◆ Pe croniche, simpri tal 2001, te Comission diocesane pe liturgjie e pal cjant in glesie, si cjatavisi par dâ dongje un libri di cjants par furlan, sloven, todesc, latin e talian. Simpri in chel an, te domenie dai 10 di Jugn, in place Sant Pieri a Rome al fo proclamât sant devant dal mont intîr pre Luîs Scrosop, pari des frutis derelitis di Udin e fondadôr de Famee des muiniis de providence. O podìn ancje ricuardâ che propit in chel an, fra di nô e à scomençât a balinâ il desideri di un pelegrinaç in Tiere Sante come grup di Glesie Furlane.
In chê volte o vin tant gjoldût pai fats e pe sperance, e invezit in dì di vuê o scugnìn gloti la pirule di un vueit pastorâl: sul altâr, pe nestre int, al mancje il nestri Messâl.
◆ Nol è che il Messâl par furlan al sedi la panacee par risolvi la situazion disastrade de messe che e viôt lis glesiis simpri plui desertis. La messe e je malade di tantis patologjiis che dome il Messâl nol risolvarès; ma a pensâle ben, Lezionari, Messâl e lenghe de int soredut tai paîs piçui a varessin podût dâ un contribût decisîf par une rifondazion vive e comunitarie de liturgjie. Cul timp a saressin stadis superadis la imposizion dal talian, la regule fisse dal rît e la pecje dal clericalisim. La vite concrete dai ultins, une condivision popolâr responsabil, une semplicitât di famee al è ce che al mancje tai incuintris liturgjics des nestris comunitâts.
◆ Messâl o no, o vin di partî de messe: di une comunitât che e scolte la Peraule, e che e interven e e pree intune comunion sinodâl inclusive no devant ma in cercli ator dal altâr. Tal mieç, il Pan de Eucaristie, misteri de fede, il Signôr de eterne aleance, mestri, miedi, vuide dal cristian.
“Chel che al à orelis, che al scolti” al dîs il vanzeli. Mi plâs zontâ ancje lis peraulis ripetudis par siet voltis te Apocalìs: “Chel che al à orelis, che al scolti ce che il Spirt al dîs aes glesiis” (Mateu 13, 9; Apocalìs, cjapitui 2-3). Consolâts par un lamp tai biei moments dal 2001, cumò o vin di tornâ ae realtât de umiliazion dal Messâl. Cjapìn coragjo, cjaminìn, forsit “judâts di cualchidun”, o adiriture “di bessôi” come che spes a noaltris Furlans, al di là des promessis, nus è sucedût. ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +