“Ogni dì une novitât, mîl comandamens: ancje l’avocat al finìs cul capì nuie e jò mancul di lui: quale lez valie? Che gnove o che vecje, cui lu sa? Jo o sai une robe sole, che duc’ vuelin jessi parons e ca no si po parasi in nissune maniere, e pazienze cu la lez, che si po messedale e voltale un pôc cemût che si ûl, ma cu la magnocule al è propi un afâr serio”.
◆ Cussì e tache la lamentazion di Nando, il zovin dal avocat, inte farse che e vierç chest librut (9,5 par 14) di une setantine di pagjinis. Une comedie, duncje, cui personaçs avonde tipics des farsis, vâl a dî la femine contadine cjacarone e peteçone, l’om sometût a jê, i zovins vivarôs e plens di astuziis, il frut plen di morbin, l’avocat une spane plui insù su la scjale sociâl. Ma dutis chestis personis a àn un alc che ju met in comugne: a àn fam! I contadins di mancul (a son di Crupignins, un paisut dal comun di Turpignà su la Tor), i citadins di plui. O sin in timp di vuere, bombardaments no son mancjâts, daspò dai mucs a son vignûts i inglês, ma la situazion de fam no va in miôr. E alore, cuant che intal ufici dal avocat e rive une zee cu lis luianiis, ce puedial sucedi? La farse, però, no siere i voi devant dai dramis che la vuere e puarte cun se. Di une bande i partigjans, di chê altre une zovine che no si à tirade indaûr ni cui mucs ni cui inglês: jerie dome fam? E vie lôr i cjavei, coçonade di brut intal mieç de place!
Cheste atenzion pes disgraciis e pes bruturis che ogni vuere e puarte cun se si le cjate ancje intal prin dai doi monolics che a completin il librut: L’ombrenâr (ah! i biei mistîrs di une volte!). O sin juste daspò finide la vuere e chest om al conte dut ce che al à patît di soldât in Albanie, in Grecie, in Afriche e po suntun tren plombât a Dachau, li che al à provât ce che cumò, biel che al è indurmidît par tiere, i torne sù tant che un vencul: i pâr di jessi un di chei ebreus fats murî conzelâts, chei che lui al à scugnût lâ a cjapâ sù par butâju intai fors crematoris.
In chel altri monolic Lassait che mi sbrochi! une zovine camarele e conte in ce maniere che e cjape da dî cu la sô parone une dì sì e chê altre ancje, tant che e pense di lâ vie, magari a Milan. Però, in fin dai fats, no sta masse mâl chenti, ancje par vie di Bepo che le menarà a balâ. ❚
