Vot agns di restaurs a tornin
a puartâ la plui vecje glesie di Udin
al so sflandôr antîc
Dopo vot agns di restaurs, la plui vecje glesie di Udin e torne a nassi: e dut il mês di Otubar al sarà une fieste par celebrâ un intervent di tutele che al è deventât ancje un progjet di valorizazion culturâl. Il sestament architetonic e struturâl si ten dongje cu la sigurece, ma ancje cuntune leture iconografiche des oparis e dai rescj che la Plêf di Sante Marie dal Cjistiel di Udin e puarte dentri di se: testemoneance di une storie che e va indaûr salacor fin ae ete langobarde. In particolâr, la decorazion des absidis e tancj frescs votîfs che a son presints su mûrs e colonis des navadis laterâls, a son il segn dal passaç di pitôrs che, messedant plui tradizions, a àn lassât une olme determinante pe storie de art medievâl no dome in Friûl tal periodi jenfri dai secui XIII e XV.
◆ Cun grande sodisfazion il plevan bons. Luciano Nobile al à inmaneât une schirie di apontaments par mostrâ ae citât il sfuarç di ents, istituzions publichis e privadis, aziendis e citadins. La benedizion e sarà domenie ai 5 di Otubar aes 6 di sere, cul vescul Riccardo Lamba, e la procession aux flambeaux insiorade de Capele Musicâl de Catedrâl e de Filarmoniche di Colorêt di Prât. La crôs de Glesie Mari di Aquilee e vuidarà dutis lis crôs des Plêfs de Arcidiocesi fin tal Domo, là che si disarà messe.
◆ Dôs celebrazions liturgjichis speciâls a son previodudis domenie ai 12 a misdì, cuant che si disarà messe inte plêf pai fruts de parochie che a fasin dotrine e pai lôr paris e maris, e sabide ai 18, cuntune messe celebrade dal vescul emerit, Andrea Bruno Mazzocato: par cheste ocasion a saran invidâts ducj chei che si son maridâts in cheste glesie, di simpri la plui amade dai nuviçs di Udin.
◆ Tai vinars di Otubar chest piçul tesaur si podarà visitâ in gracie de vuide Maria Beatrice Bertone, la diretore dal Museu dal Domo che ducj a àn imparât a cognossi pe sô competence e sensibilitât. A messedâ liturgjie e culture, a saran ancje ocasions di incuintri pardabon interessantis: miercus ai 8, par esempli, aes 8 e mieze di sere “I zovins a incuintrin Barabba” al varà par protagonist Pietro Sarubbi, atôr dal film “The Passion” di Mel Gibson. Sot Nadâl, ai 15 di Dicembar, la scree de Novene de bande dal Arcivescul e coventarà par fâ jentrâ di gnûf inte plêf il cjant dal “Missus”, e la vilie di Nadâl la messe e sarà cjantade dai Pueri Cantores direzûts di Anna Maria Dell’Oste.
◆ Cun di plui, la glesie e sarà contade e ilustrade in doi volums che a saran publicâts dal Istitût Pio Paschini. Si previôt che il prin al sedi pront za pal mês di Dicembar. ❚
