Pe rinassite dal S. Simon

Si clamin Federica Angeli, Barbara Battel, Cristina Micelli e Giacomo Trevisan (ma altris si stan za metint in vore). Pal moment a àn produsût siet contis jentrant tal mont di U-. A son i protagoniscj di une fanfiction ch’e à tacât a jessi publicade, di sabide in sabide, sul gno website.
No mi plâs, in gjenar, fevelâ des mês robis, ma in chest câs o stin fevelant de vivarosetât dal mont leterari furlan e dai siei gnûfs autôrs che a metin in discussion la polemiche su la crisi dal furlan ch’e à vût acèt ancje su chestis pagjinis cualchi mês indaûr. E alore o larin indenant.
Intant lin a spiegâ ce ch’e je une fanfiction: si trate di une opare scrite di fan che a cjapin il trat di storiis o di personaçs di une altre opare origjinâl. Al è un fenomen che al è leât a la nassince di un fandom, vâl a dî di une comunitât di personis che si passionin di cualchi espression culturâl (de leterature, dal cine, di un autôr…). In chest câs dut a è nassût tal cercin di un laboratori di scriture narative inmaneât di Bottega Errante te sede di Radio Onde Furlane. O ai proponût, te mê sezion didatiche dedicade al romanç, une sperimentazion: jentrâ in autonomie, cun propis personaçs e propis narazions, tal mont di U-, doprant lis regulis che a dissiplinin chê ideâl costruzion leterarie.
U- al è l’ultin gno romanç jessût tal Novembar dal an passât e il mont di U- al è componût di ducj i romançs che a sedin mai stâts scrits, cjapant dentri ancje U-, il romanç che lu descrîf. O varês capît che cun cheste opare, la ultime che à vinçût il Premi S. Simon, o jentrìn cu la marilenghe tal cercin de leterature fantastiche. E cuale palestre plui libare e disfrenade ise chê de leterature fantastiche par liberâ la fantasie di gnûf autôrs? Ven a stâi che la robe e je partide e à produsût risultâts di cualitât une vore interessants.
Al vûl dî, in struc, che no je crisi tal mont de leteradure par furlan. Fasêt atenzion a la finece di chest fenomen: si trate di autôrs che no si metin in vore par scrivi e publicâ online une lôr conte in dut e par dut origjinâl, ma che a metin a disposizion  par un progjet la lôr cognossince e la lôr abilitât tal scrivi.
La fanfiction dal mont di U- e je vierte a ducj. Ducj a puedin partecipâ: par cognossile no covente altri che lâ a viodi tal gno website (www.francomarchetta.net) te sezion L’infinît di U-.
E cussì il Premi S. Simon rinovât, simpri inmaneât dal Comun di Codroip cu la colaborazion dal ARLeF, al à savût racuei lis novitâts che il mont leterari furlan, soredut chel dai zovins, i tornave indaûr. Di fat il gnûf bant de 35e edizion al previôt di ameti in concors no dome il romanç ma ancje la racuelte di contis, dant spazi a une forme leterarie che e à vût cetante fortune tes publicazions de riviste La Comugne e tal website Conte Curte di Raffaele Serafini  (http://contecurtegnove.blogspot.it/). Di soreplui, chest an il premi no si limitarà a la formule tradizionâl cul concors e la serade di proclamazion. Il volum de opare vincidore al vignarà publicât daurman di une cjase editorie e al vignarâ presentât intun event particolâr, cu la partecipazion di personaçs impuartants de leterature. Ma ancje chei che no varan rivât a vinci e che a saran stâts segnalâts de jurie, no saran abandonâts dopo il lôr sfuarç no di pôc ma a deventaran protagoniscj di leturis, incuintris, publicazions online, cussì di fâ tornâ il Premi San Simon ce che al jere prime de suponude crisi: il pont di riferiment culturâl plui impuartant de narative par furlan.❚
Franco Marchetta