A pene che a jentrin inte glesie za scurute, Marc e Bete a son incolmâts de musiche potente e maestose dal orghin. La glesie, vueide di int, e je implenade dai sunôrs di arint dai riplens e di chei profonts dai bas di pedâl. I doi zovins, cu lis vibrazions che ur jemplin il pet, a montin sù pe scjalute ripide par rivâ te cantorie, là che a cjatin Pieri, l’organist, cjapât de esecuzion, che nancje no si inacuarç di lôr. I doi a stan cidins, a cjalâ inmagâts lis sôs mans e i pîts che a corin pes tastieris e pai pedâi, fin a cuant che, zirade la ultime pagjine dal spartît, il toc al finìs. Intant che si sfante il rivoc de musiche, Pieri ju viôt: “Buine sere, fantats!” “Buine sere, mestri Pieri”. “Clamaitmi dome Pieri che, dopo che o vin cjantât il Missus, us stimi tant che coleghis. Us ai clamât parcè che o varès voie di fâus cjantâ alc par Pasche.” E Bete: “Ce varessino di cjantâ?” “La secuence Victimæ paschali laudes, dulà che tu, Bete, tu fasaressis la part de Madalene. Ma mi plasarès – al zonte Pieri – ancje meti sù Ubi Charitas est vera che al è il cjant just pe Joibe Sante. Pensait che lu à scrit Sant Paulin patriarcje di Aquilee. ” E Marc, scherçant: “Ma mestri, simpri robe vecje di Aquilee!” Sustât, l’organist lu bloche: “Frut, prime di fevelâ, scoltile!” Al poie lis mans su la tastiere e al tache la prime strofe. Une musiche dolce e clare, ancestrâl. E somee che e rivi drete di Cividât, partide 1200 agns fa. Prime che i doi a vierzedin la bocje, Pieri ju ferme: “Cumò o lin te ostarie, se no mi ven la pivide, e alì o fevelìn.”
◆ “O ai studiât cul mestri Albin Perosa, il bonsignôr musicist, chel che al à scrit musiche a pleton – al tache Pieri dopo ve glotût mieç tai – O jeri ancje in confidence cun pre Gjilbert Pressac e e je une vite che o suni ator pes glesiis dal Friûl! Vûstu che no sepi il gno mistîr?” “Scuse, Pieri, ma no ai nissun dubi su la tô sgrimie te musiche. La mê e jere dome une batude. Jo e Bete si sin a pene dits che Ubi Charitas al è bielon e che nus fasarès plasê cjantâlu!” “Ah bon! Nuie di meti, savêso, cu la sô traduzion talianote ‘Dov’è carità e amore’ che si cjante cumò pardut. Ma in Vatican, la Joibe Sante, a cjantin ancjemò Ubi charitas est vera che Sant Paulin patriarcje al à scrit par Concili di Cividât dal 796.”
◆ E Bete: “Ogni volte che o feveli cun te mi vegnin simpri sù gnovis curiositâts. Cuant che o fasevin provis pal Missus, tu nus âs fevelât di Sant Cromazi vescul. Cumò di Sant Paulin patriarcje. No capìs une robe: parcè un lu âstu clamât vescul e chel altri patriarcje? No si fevelie simpri dal vescul di Aquilee?” E l’organist, dopo vê parât jù dute la tace, planchin planchin, par pensâ a ce rispuindi: “Bete, la diocesi di Aquilee e jere une vore autorevule e preseade. A un ciert pont i vescui a àn tacât a clamâsi patriarcjis. Mi somee – ma no soi sigûr – tal timp dal schisme dai Trê Cjapitui, ma no mi visi ben cui che al è stât il prin. A cjase o cjalarai tai miei libris e te prossime prove, sabide cu ven ae stesse ore – puntuâi marcomandi – us savarai a dî! Mandi, par vuê.”
◆ La setemane daûr, dopo des provis, simpri te ostarie dai Gardelins, Pieri al à pronte la rispueste: “Alore, il vescul di Aquilee che par prin si à fat clamâ ‘patriarcje’ al è stât Paulin.” “L’autôr di Ubi Charitas?” Lu interomp Bete. “No chel! – le ferme Pieri – chel al è Sant Paulin II, vivût tai timps di Carli il Grant. Jo o feveli di Paulin I, che tal 558 al à clamât dongje un sinodi cun ducj i vescui sufraganis di Aquilee e si à distacât di Rome. Al à fat duncje un schisme, al à declarât Aquilee glesie autocefale e lui al à tacât a fâsi clamâ patriarcje. Il schisme al è dit dai Trê Cjapitui, une cuistion teologjiche su la nature di Crist, dulà che lis grandis diocesis di Aquilee e di Milan i àn tiradis lis orelis al pape che si jere pleât aes pretesis dal imperadôr Justinian intun cantin di fede. Capît? Il nestri vescul al jere tal just e il pape al falave. No dome. Ma intant che Milan, dopo cualchi an, al tornave cun Rome, Aquilee e je restade disseparade dal pape par scuasit doi secui! Parcè che ancje i sucessôrs di Paulin I a son restâts de stesse idee!” “Pieri, a mi no mi torne – al interven Marc – Za chê altre volte tu vevis fevelât dal schisme dai Trê Cjapitui e alore o soi lât ancje jo a viodi tal gno libri di storie, che o fâs il liceu. O ai cjatât che i papis a àn cirût di dut par fa tornâ Aquilee te catolicitât ma che, cul fat che il Friûl al jere stât cjapât dai Langobarts, a chescj ur stave ben che al fos dividût di Rome, che e jere sot de tutele bizantine. E che…” “Fermiti, Marc. Chê code no va su chê agnele! O podarès contâti trops tentatîfs, ancje violents, che il pape e i bizantins a àn indreçât cuintri dai patriarcjis di Aquilee che no àn molât, par 150 agns, la vere fede. Ma nol covente. Chel che tu tu mi contis al è scrit tun libri di storie talian. Magari cussì no, in Italie la storie spiegade tes scuelis e à parintât plui cu la “educazion nazionâl” che no cu la veretât, come che al à denunziât un che le saveve plui lungje di me, Josef Marchet. Tai libris di scuele tu cjatarâs simpri che il ben e il just a rivin di Rome, di Vignesie e de Italie. Dut ce che al va cuintri di cheste veretât (che je une bale grandonone) al ven platât e no tu lu cjatis. Fas une prove: la setemane che e ven contimi tropis riis che a son tal to libri che a fevelin dai 17 secui dal patriarcjât di Aquilee, massime dai patriarcjis todesc, cuant che la nestre Patrie e jere il cûr politic e culturâl de Europe! Ti spieti ae vuaite, frutat! Ma intant studie la nestre Ubi Charitas est vera, che le cjantin ancje a Rome. Maman.” ❚
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +