Lis vicendis di une istituzions straordenarie come spieli di une Patrie che e je ancjemò vive intal cûr di tancj furlans
“Nono, nono, contimi une storie!” Cussì e jere tacade, za doi agns, cheste rieste di contis. Gno nevodut mi lambicave cence padin par che i contàs une storie. Ma nol voleve chês classichis, che lis saveve a memorie. Samuêl, che al à un arment di cjavai di plastiche e di soldadins che mi jemple la cjase, al voleve, anzit al pretindeve, storiis di cavalîrs, di cjistiei, di arcîrs, in struc aventuris di cape e spade. Jo, suiât il gno repertori, o soi lât a sgjavâ te mê passion: la storie dal Friûl, massime chê de Ete di Mieç. E alore mi son vignudis iniment une schirie di storiis di vueris, di bataiis, di ingjans, di vuaitis e maçalizis, ma ancje di diplomazie, di inteligjence, di art e di glorie. Ogni storie e veve tal fonts la figure di un patriarcje di Aquilee e di chel no ai inventât nuie ma o ai contade la storie vere.
◆ “Samuêl, ti ai simpri contât la storie di un patriarcje, no mo?” “Sì, nono.” “Ma sâstu cui che al jere il patriarcje?” “Il vescul di Aquilee!” “Just, ma no dome. Al jere plui di vescul.” “E parcè, nono?” “E je une storie lungje…” “Miôr se e je lungje, conte, dai!” “Alore, tu sâs che Aquilee ai timps di Rome e jere une citât grandonone.” “Sigûr, nono, o ai let no sai tropis voltis Il tesaur di Aurelianus che mi à regalât la none. Al conte la storie di un frut e dai soi amîs inte Aquilee dai Romans, ae scuvierte dai tesaurs platâts e de sô storie. Bielon!” “In chê volte Aquilee e jere strategjiche parcè che di culà a partivin i imperadôrs romans par concuistâ lis tieris a soreli jevât e a tramontane, e dopo i vescui a mandavin predis e munics a insegnâ il vanzeli a ducj chei popui. Si che duncje, la Glesie di Aquilee e je deventade mari di dutis chês glesiis e il vescul di Aquilee al è deventât arcivescul cun, sot di se, altris 18 vescui, di chel di Como fin te Ongjarie.” “Al sarès come un super vescul?” “Juste. Ma no je finide. La Glesie di Aquilee e à tacât a vê vescui sants, studiâts e babios, tant che Valerian e Cromazi che a àn tacât a dî alc di diferent dal pape di Rome: che Aquilee e jere stade implantade dal apuestul S. Marc e dal so dissepul Ermacore; che e veve il so Credo, la sô liturgjie e la sô musiche, la sô lenghe “rustiche” par fâsi capî di ducj. Par fâle curte, te prime ocasion di discussion, il vescul Paulin, tor dal 560, al distache la glesie di Aquilee di chê di Rome e al tache a fâsi clamâ “patriarcje” come il pape.” “Ben fate! A Rome jerino pucefadie come cumò?” “Plui o mancul, frut. Il schisme (cussì si clame la division) al è lât dilunc par cualchi secul. Ae fin Aquilee e je tornade cun Rome, ma e à tignût il titul dal patriarcje e si è infuartide ancjemò di plui.”
◆ “E dopo, nono?” “Eh, dopo a son rivâts i langobarts. Sâstu cui cui che a son?” “Sigûr, o ai pene let il libri Une zornade cun Berte, ancje chel regâl de none. Al conte di Berte, frute langobarde che e vîf a Cividât. Une dì, Berte no cjate plui il so pontepet e e va a cirîlu. A son bielis figuris che a fasin viodi cemût che a vivevin i langobarts: a son lis stradis, lis cjasis, i ogjets, lis peraulis e il mangjà di chê volte.” “Ben, brâf! Propit in chel timp il patriarcje Calist al va a stâ a Cividât. E dopo o vin Paulin II che al jere amì di Carli il Grant, e dopo tancj altris che a fasin cressi la autorevolece dal patriarcjât. Come Popon che al torne a tirâ sù la basiliche di Aquilee, o Siart, che al rive a vê dal imperadôr il titul di Duche da Friûl par lui e par ducj chei dopo di lui.” “Ce vuelial dî duche?” “Che di chê volte il patriarcje nol sarà dome vescul di Aquilee e a cjâf di chei 18 vescui che ti ai za dit, ma ancje princip de Patrie dal Friûl, cul podê civîl e militâr di meti tassis, bati monede, judicâ e fâ vuere. A son stâts cuatri secui di aur pal patriarcjât. Cun oms fûr dal ordenari tant che Uldarì, Pelegrin, Volchîr, Bertolt, Raimont, Beltram e Marquart, la Patrie dal Friûl e je deventade simpri plui impuartante, fuarte, clâf tra l’imperadôr e il pape, siore di culture e di art tal mieç de Europe. La Patrie e veve il so Parlament e lis sôs Costituzions. Po dopo, la Patrie e cjapave dentri furlans, todescs e slâfs ma no je ni todescje, ni slave, ni taliane parcè che e jere a cjaval di chei che cumò o clamìn confins. Propite cheste e jere la sô particolaritât.”
◆ “E cemût finissie la conte, nono?” “Mâl, frut. La Patrie e veve simpri fat gole a chei dongje: i trevisans, il cont di Gurize, i Habsburg, i venezians. I patriarcjis a jerin simpri rivâts a parâju indaûr. Ae fin, propite Vignesie, tal 1420, profitant di un moment flap de politiche, des divisions dai furlans e di cualchi traditôr, e rive a concuistâ la Patrie e a gjavâur il podê ai patriarcjis, lassantjur dome chel religjôs. Tal 1751 il pape al sdrume ancje la figure religjose dal patriarcje di Aquilee e tal so puest al met doi arcivescui, un a Udin e un a Gurize.” “Alore – al domande Samuêl scunît – il Patriarcjât, la Patrie, il Friûl no esistino plui? No isal restât plui nuie di dutis lis bielis storiis che tu mi âs contât?” “Frut, i furlans a son finîts sot di Vignesie, di Napoleon, dai Habsburg, dai Savoia, ma a son simpri restâts furlans. Di ducj chei secui dal patriarcjât nus à restade la nestre lenghe, il nestri mût di vivi e di viodi il mont, che nol è fat di confins, come che nus àn imponût chei che nus àn paronât, ma al è fat di tantis diferencis che nus fasin siôrs. Jessi e, se o volìn, restâ diferents, e je la ricjece dai furlans!” “Bon, nono, ma alore no je finide cussì mâl. Se a son ancjemò i furlans al vûl dî che la Patrie dal Friûl e je ancjemò vive e che, se si din di fâ, si podarà ancje infuartîle, no mo?” “Sigûr, nevôt. Cumò ti tocjarà a ti.” ❚
