Sfuei Mensîl Furlan Indipendent
Archivi de Patrie

I PROTAGONISCJ – La ultime vitorie dai difensôrs de nestre tiere

Diego Navarria

Nol è stât propit facil pai venezians concuistâ la Patrie dal Friûl. La ultime bataie impuartante vinçude dal esercit dal patriarcje e je chê combatude dongje Bant di Morsan ai 9 di Mai dal 1418, e contade in struc in cheste pagjine. I protagoniscj di chel sucès furlan straordenari a son stâts i  cjastelans di Prate, Purcie, Voleson e Prodolon, propit chei che cumò cualchi nemì dal Friûl nol clame plui furlans ma “pordenonês”. Il risultât grandonon de bataie al veve fat scjas a Vignesie e al veve confuartât il Patriarcje Luduì di Teck. I furlans a jerin convints di vê vinçût parcè che Diu al jere cun lôr. Ancjemò vuê e je vive la liende che il bosc de bataie, dongje dal Tiliment, al è bandît e sacri par rispiet di ducj chei muarts. Daspò di un an, par svindicâsi, i venezians a àn sdrumât il cjistiel di Prate, il plui fuart dal Friûl, e i comuns dongje a àn vût di sgjavâ e puartâ vie ancje lis pieris. I cjastelans si son dividûts e lis comunitâts dal Friûl a àn tacât a metisi une cuintri di chê altre, cussì che tal 1420 la Patrie e je stade cjapade di Vignesie. O cjati just marcâ chê ultime vitorie di chei che a àn difindude cun ardiment la nestre tiere dal invasôr. Daspò, i furlans a son stâts sometûts ma, in spiete dal riscat de sotanance, no àn di pierdi la memorie de lôr storie e la braùre de lôr identitât. ❚
D.N.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +