PATRIARCJIS FÛR DAL ORDENARI. I PROTAGONISCJ – Dopo di lui il podê patriarcjin al restà sul Nadison par cinc secui

Calist al fo patriarcje di Aquilee dal 731 fin ae muart (tra il 756 e il 762). Con lui il patriarcjât al jes di un un periodi nereôs e platât. Si cognossin, di fat, a malepene i nons dai patriarcjis prime di lui, ancje parcè che, fin al predecessôr Seren, la Glesie di Aquilee e je stade schismatiche. Ven a stâi, par vie dai Trê Cjapitui, si jere dividude di chê di Rome che, invezit, e jere in cubie cun chê di Grau.
◆ Calist, che al jere diacun a Trevîs, al ven nomenât patriarcje dal re dai Langobarts Liutprant che al è a Pavie. In chel timp, la sede dai patriarcjis no jere plui a Aquilee, malsigure, ma a Cormons. Su la mont Quarine, il cjistiel al è discomut e fûr man. Al va ben par difindisi ma no par vivi e guviernâ. Cuant che Calist al rive a Cormons, Pemon al è il duche dal Friûl a Cividât, capitâl dal ducât. Simpri a Cividât al è a stâ il vescul di Zui, Fident, che al è daûr a filâ cun Pemon parcè che la citât e vedi il sô vescul. Ae muart di Fident al devente vescul di Zui Amadôr, ancje lui amì di Pemon e di famee siore. Calist nol pues acetâ che ae cort langobarde al sedi un vescul so sotan, magari a intiessi trainis, intant che lui al vîf cui contadins e i boscadôrs. Al cjape la ocasion de gnove nomine di Amadôr e, di bot, al jentre a Cividât, lu bute fûr di cjase e al va a stâ tal so palaç. Al duche Pemon la robe no i va jù, al fâs cjapâ Calist e lu siere tal cjistiel di Duìn. A chest pont, si môf il re Liutprant che al destituìs Pemon e al nomene duche so fi Ratchis. Al somee clâr che la cuistion jenfri Liutprant e Pemon e jere dute politiche e che il patriarcje Calist al jere stât nomenât dal re propit par chest.
◆ Cividât, deventade capitâl civîl e religjose, e vîf – di chel moment, cun Ratchis e Calist – un timp di aur. Calist al tache a tirâ sù il domo e il palaç che al sarà sede dai patriarcjis par cinc secui, fin al taramot dal Nadâl dal 1222. Di chel palaç, che al jere alì che cumò al è chel dai proveditôrs venits, nus reste il “poç di Calist”. Ma chel duche e chel patriarcje a àn peât il lôr non a doi monuments une vore impuartants de ete langobarde, clamâts propit Are di Ratchis e Batisteri di Calist. Oparis mestris par significât e bielece, di gjoldi tal Museu dal Domo. ❚