I PROTAGONISCJ – Al fo il moment di plui alte autonomie dal stât furlan

Bertolt di Andechs, al è stât Patriarcje di Aquilee dal 1218 fin ae sô muart, tal 1251. Il so patriarcjât di 33 agns, lunc e vivarôs, al incjarne espression la plui alte dal partît ghibelin che al à tant che riferiment il grant imperadôr Fidrì II. Ma propit i ultins agns dal guvier di Bertolt a segnin la svolte de politiche furlane cu la adesion al partît vuelf, cun dut ce che chest al compuartarà tal avignî de Patrie.
◆ Bertolt, di famee todescje potente, a pene che e rive in Friûl al scuen scombati cuintri dai nobii furlans che si jerin aleâts cun Trevîs. Cun aleancis abilis ancje cui comuns furlans, al rive a vinci. No son provis che al sedi stât lui a implantâ il Parlament de Patrie ma la prime delibare che o vin e je dal 1228 e o podìn prossumâ che la presince ancje dai Comuns, dongje dai nobii e dai prelâts, e sedi consecuence di chê aleance.
◆ Cun Bertolt, Udin al à un grant disvilup e al devente une citât. Il Patriarcje, par vie dal taramot che al sdrume il palaç di Cividât, si trasferìs sul cjistiel di Udin. Tal 1223 i concêt esenzions e un marcjât (Marcjât vieri) che al fâs incressi la borghesie citadine. Al tire sù la glesie di S. Durì tant che gnûf domo e, tal 1248, al implante un gnûf marcjât (Marcjât gnûf) pal cumierç une vore incressût.
◆ La plui part dal guvier di Bertolt e je dongje dal imperadôr Fidrì II. Lu compagne ator pe Italie, al è ae sô incoronazion a Rome, lu difint te pâs di S. Zerman e te diete di Ravene, al è cun lui fin a Jerusalem. Tal 1232 Fidrì II e la sô cort a son ospits dal patriarcje a Cividât. Cuant che l’imperadôr al impresone il fi ribel Indrì, lu da in custodie propit a Bertolt. A Tivoli, l’imperadôr al firme la conferme a Bertolt dai dirits sul Friûl e lis prerogativis feudâls dal patriarcje. Chest at al certifiche il moment di plui alte autonomie dal stât furlan. Ma tal Concili di Lion la maiorance e scomuniche l’imperadôr e Bertolt al scuen slontanâsi dal so amì Fidrì e si alee cul partît vuelf. E cussì a saran vuelf i patriarcjis dopo di lui.
◆ Il lunc patriarcjât di Bertolt al è impuartant ancje pe produzion artistiche. Lis pituris su lis absidis di S. Marie di cjistiel, la glesie di S. Durì di Udin, chês di S. Catarine dal Cormôr, de Taviele di Madrîs, di Primulà, di S. Nicolau di Martignà, di S. Andree di Parteulis, dongje dal Crist Bresciani di Çarvignan e dai maraveôs salteris miniâts di Egbert e di S. Lisabete, a fevelin di une tindince artistiche gnove che e sa meti dongje l’inflùs talian dal Antelani e inflùs nordeuropeans. Duncje une circolazion culturâl vivarose, spieli dal respîr politic ampli dal patriarcje Bertolt ❚