I PROTAGONISCJ – Al è stât il protagonist dal “Schisme dai Trê Cjapitui”

Paulin I al devente vescul di Aquilee tal 558. Al ven consacrât dal vescul di Milan daûr di une antighe tradizion che i vescui di Milan e di Aquilee si consacravin l’un cul altri. Za subit il pape al conteste cheste regule, soredut parcè che Paulin al veve declarade la sô fedeltât al concili ecumenic di Calcedonie e al dineave di condanâ lis tesis dai “Trê Cjapitui” come che al pretindeve l’imperadôr bizantin Justinian.
◆ Dal contignût dal schisme o tornarìn a fevelâ. Paulin, dut câs, nol scolte il pape, anzit, al clame dongje un sinodi dai vescui dipendents di Aquilee, che lu clamin pe prime volte “Patriarcje” e che a rispuindin al pape un biel “lafè no!”. Di Paulin nus restin soredut testemoneancis romanis, letaris dulà che il pape al dîs che al è “pseudoepiscopus”, al met in dubi che al sedi munic, fintremai lu scomuniche e lu sbelee cul clamâlu Paulinus (come che lu cognossìn nô) invezit che cul so non di Paulus. E dut parcè che te fede no si jere pleât, come il pape, ai ordins di Justinian e ai siei compromès. Il poete Venantius Fortunatus, invezit, lu definìs “pius” e Pauli Diacun lu clame “beatus” e lu presee une vore. Ma Paulin I nol sarà ni beât ni sant, come che impen al sarà canonizât l’omonim S. Paulin II, amì di Carli il Grant e filoroman. Al somee clâr che ancje i papis a patissin di invidie…
◆ Paulin I al mûr tal 569 a Grau, là che si jere parât par pôre dai Langobarts. Dut câs, il “Schisme dai Trê Cjapitui” al larà indevant par 150 agns, marcant ancjemò di plui la diference jenfri Rome e Aquilee. ❚
D.N.