“Patriae”, un film sul Patriarcjât spiegât ai furlans plui zovins

Ai prins di Avost a Aquilee e à vût grant sucès la proiezion dal docufilm di Marc D’Agostini, Patriae, viaç tal Patriarcjât di Aquilee. La storie di cheste grande istituzion e ven contade traviers de scuvierte che a ‘nt fasin une fantacine e so pari. No son avonde lis informazions che la frute e tire jù dal ordenadôr: si lasse cjapâ de curiositât di lâ a viodi sul puest lis olmis di chê gloriose ete furlane. E alore vie a Aquilee a scrutinâ i mosaics de basiliche e i sgjâfs archeologjics, ma ancje a S. Zorç de Richinvelde par viodi il puest dal sassinament dal patriarcje Bertrant, a Udin par amirâ lis pituris che a ricuardin chel brut fat di sanc, fin ai cjistiei des culinis come Ruvigne.
◆ So pari le compagne, le jude cun altris informazions, ma ancje lui al à ancjemò tant ce imparâ. Framieç di chest viaç si zontin moments di aprofondiment, cu lis intervistis ai esperts di storie, di musiche, di tradizions, di art.
◆ Il regjist al slizerìs il clime seriôs de ricercje storiche, contaminant i gjenars e i lengaçs dal cine. Al dopre, par esempli, il fumut par contâ dai lavôrs pe costruzion dal grant cjampanili di Aquilee (di pierdi i voi a cjalâlu une clare matine sul cricâ dal dì) de bande dal patriarcje Popon, che no si rint cont dal tesaur di mosaics che al è daûr a sepulî par simpri sot di chês pieris. Al dopre une sorte di ‘flash-back’ cuant che Caroline, la frute, si piert a cjalâ intun vueit che nol è vueit, ma plen dai personaçs dal passât, che a dialoghin fra di lôr.
◆ Il film al è par furlan, ma a son ancje parts par talian (in plui dai sottitui), une cjançon in ocitan (cjantade di un grup in costum tradizionâl), cence contâ lis maglis di todesc sul talian di Popon.
◆ La realizazion filmiche di chest documentari e mostre a clâr la impuartance che il Patriarcjât al à vude par cirche cuatri secui. Al jere une entitât religjose, ma ancje civîl e aministrative. Dal pont di viste religjôs al veve une sô liturgjie e une sô interpretazion des scrituris, une vore plui vierte di chê romane che e à finît par prevalê. La rêt di Jone, intai mosaics de basiliche, e cjape dentri ducj i oms e lis feminis, nol impuarte se a jerin gentili, vâl a dî no ebreus. E nol impuarte nancje se a jerin di altris religjons. No par nuie il Friûl al jere tiere li che si miscliçavin etniis, culturis, lenghis. Il puart di Aquilee al jere colegât cun Alessandrie di Egjit di une sorte di  servizi di linie, cun nâfs che a levin indevant e indaûr une volte ogni mês (il viaç al durave trê setemanis). Al ven di domandâsi ce cors che e varès cjapât la storie no dome dal Friûl, ma di dute la cristianitât se il schisme dai Trê cjapitui al ves vût un altri esit. In chê vicende (secui VI e VII) che e viodè une part des glesiis de Italie dal Nord e dai Balcans fâ riviel cuintri di Rome, il rûl dai vescui di Aquilee al fo determinant.
◆ La storie no si fasile cui ‘se’, al è clâr. Ma il film al à il merit di tirâ fûr cuistions che a domandin aprofondiments e riflessions de bande di chei tancj che, chê altre sere, a jemplavin place dal Cjapitul e ancje place dal Patriarcjât (potence de tecnologjie!). Un biel messaç di furlanetât che al è stât metût in evidence ancje dai salûts des autoritâts presintis e intal dialic tra il regjist e Agnul Floramo ae fin de proiezion. ❚