Sfuei Mensîl Furlan Indipendent
Archivi de Patrie

‘Patria e Matria’ 40 agns dopo. La ristampe dal «classic» di Sergio Salvi. La atualitât des cuistions nazionâls in Europe de Catalogne al Friûl, dal Paîs Basc ae Sardegne

............

Sergio Salvi al è un scritôr e un studiôs di Florence, che a tacâ dai agns Setante dal secul stât si à fat cognossi ator pal Stât talian tant che espert des cuistions des lenghis minorizadis, des minorancis e des nazions cence stât in Europe. Chê innomine le à vuadagnade par vie che al è stât un dai prins talians a frontâ chei argoments cence prejudizis, cun snait, cun competence storiche e politologjiche e cun capacitât divulgative. In particolâr, tra lis sôs diviersis publicazions dadis fûr tal ultin mieç secul, a son trê i siei libris che i àn permetût di fâsi cognossi e ricognossi in chê maniere: Le nazioni proibite. Guida a dieci colonie “interne” dell’Europa occidentale, jessût tal 1973, Le lingue tagliate. Storia delle minoranze linguistiche in Italia, che al è dal 1975, e Patria e Matria. Dalla Catalogna al Friuli, dal Paese Basco alla Sardegna: il principio di nazionalità nell’Europa occidentale contemporanea, publicât tra il 1977 e il 1978.

Cualchi mês indaûr, propit il tierç di chei titui, sù par jù cuarante agns dopo de sô realizazion, al è stât tornât a publicâ de bande de cjase editore sarde Papiros (www.papiros.org), cuntune biele vieste grafiche e cu la zonte di une premetidure che e met in relazion cu la atualitât i contignûts e lis riflessions dal test origjinari.

Un libri antîc e gnûf

Il libri al presente la cuistion intune suaze teoriche coerente e documentade, al denunzie il chauvinisim dai nazionalisims di stât, al marche dispès i aspiets plui ridicui di chel ategjament e al fâs indenant une interpretazion libare e di liberazion di chês dibisugnis di ricognossiment, di autoguvier, di partecipazion democratiche e di justizie sociâl che a son peadis cu lis identitâts linguistichis e culturâls e cu lis rivendicazions di tutele e di autodeterminazion.

Dilunc vie dai ultins cuarante agns il mont al è cambiât, ancje se ciertis cuistions a son ancjemò viertis e di atualitât. Par chel, cundut che il test al è une vore leât al contest storic e politic specific di cuant che al è saltât fûr pe prime volte, chê di Patria e Matria, massime in cheste gnove edizion, si pues calcolcâle ancjemò une leture interessante e utile par plui resons, a tacâ de distinzion teoriche tra «nazion» e «stât», tra «nazionalitât» e «citadinance» e tra «nazionalitât» e «regjonalitât».

Dai contignûts dal libri, de sô ristampe, e plui in gjenerâl di nazions, nazionalitâts e nazionalisims «di stât» e «cence stât», te Europe di cuarante agns indaûr e in chê dal dì di vuê, o vin fevelât propit cun Sergio Salvi, che nus à contât cemût che si à rivât a cheste gnove edizion e che nus à palesât il so pont di viste in cont di diviers argoments leâts ae sô ativitât di studi e di divulgazion, cuntune atenzion specifiche pal Friûl.

La testemoneance dal autôr

«In principi – al conte Salvi – o pensavi che, dopo tant timp, il libri al fos zaromai deventât vecjo e che pluitost al varès coventât scrivi un altri dut di plante fûr. Diegu Corraine e altris amîs sarts mi à convinçût dal contrari: che al sarès stât ben tornâ a dâ fûr il test di in chê volte, ancje tant che document di ce che si scriveve cuarante agns indaûr, e che al jere avonde zontâi une jentrade cuntune schirie di riferiments a ce che al è sucedût dopo, cun chê di marcâ i elements di continuitât e di discontinuitât e par meti in relazion il test origjinari cu la situazion dal dì di vuê. Cumò o crôt che o vedin fat ben a fâ cussì».

«In chescj cuarante agns a son stâts tancj cambiaments – al zonte l’autôr – dal sfantâsi de Union Sovietiche, de Yugoslavie e de Cecoslovachie, cu la creazion di diviers gnûfs stâts te Europe orientâl, fintremai ae evoluzion positive, almancul par ce che al inten la normative e cualchi azion politiche, de tutele des minorancis tal Stât talian. Però, te Europe ocidentâl, al è ancjemò alc che si môf: il contest al è diferent, ma chest dinamisim al tocje propit chês stessis situazions che a jerin in moviment in chê volte: la Scozie, la Catalogne, il Paîs Basc, la Corsiche, il Gales, la Sardegne e il Friûl».

La Europe e il Friûl, dal 1977 al 2017

Salvi al marche che a son dinamisims diferents: «In Scozie, in Catalogne e tal Paîs Basc a son nivei di cussience e di mobilitazion politiche une vore alts, in Gales la mobilitazion e je fuarte sul plan de lenghe ma ancje in dì di vuê e je plui debile in tiermins politics, in Corsiche tai ultins agns e je stade une evoluzion impuartante, cu la coalizion nazionalitarie che e e je al guvier de isule, cui risultâts des elezions plui resintis e cu la riorganizazion che e je in vore dentri dai partîts e dai moviments, intant che Friûl e Sardegne no àn ancjemò rivât a fâ ad in plen chel passaç de rivendicazion linguistiche ae rivendicazion politiche».

Cemût viodial Sergio Salvi la situazion dal Friûl? «Par ce che al tocje la lenghe – al rispuint – a son stâts jonzûts risultâts pardabon interessants, cundut che al è ancjemò cetant ce fâ. Sul plan politic, o viôt che a saltin fûr grups e moviments di ogni sorte. O speri che si rivi a une sintesi positive e inovative, però o crôt che, par ce che al tocje organizazion, mobilitazion e consens, nol sedi stât ancjemò jonzût chel risultât ancje par vie de sielte fate di tancj di lôr che, tra la fin dai agns Otante e i prins agns Novante dal secul passât, a deciderin di deventâ leghiscj. La adesion ae Leghe Nord e la ‘padanizazion’ de cuistion furlane si pues calcolâlis pardabon tant che un grues erôr e salacôr une deviazion psicologjiche che e à fat dam al Friûl».

Marco Stolfo

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +