“Passi d’Inchiostro”: la vôs zovine dal Friûl e cjamine pal mont

A l esist un lûc, in Friûl, dulà che la lenghe no je un ricuart di tignî tal vâs intune vetrine, ma un imprest che al scote simpri te man di chel che al scrîf. Chel lûc si clame “Passi d’Inchiostro”, e la sô storie e je la storie di une piçule vôs deventade corâl.
◆ Dut al è tacât cuntun non ancjemò plui umil: “Incastri”, une racuelte di nûf vôs, une grampe di zovins che a vevin ancjemò dut di dî e nissune pôre di dîlu. Ma une lenghe, cuant che e cjate int che le scrîf cun passion, no reste ferme: e cres, si inricjìs, e clame altris. E cussì, ator di chei nûf, cul passâ dal timp, si è formât un côr: 65 autôrs sot i 25 agns che a scrivin, cui par talian, cui par furlan, cui par francoprovençâl, cirint ognidun la sô maniere par contâ il mont.
Dut chest si materialize intun librut che al ten dongje une polifonie uniche, dulà che ogni vôs, par piçule che e sedi, e cjate il so puest tal côr.
◆ No je une antologjie come tantis. E je une dimostrazion, vive e fuarte: lis lenghis minoritariis a son imprescj che a àn ancjemò fuarce di tocjâ, di movi, di fâ comunitât. Daûr dal progjet a son Elia Trentin e Alice Bozzetti, poetis e promotôrs culturâi de Associazion Scritôrs Friûl-VJ, che di chest côr di vôs a àn fat un viaç: no une semplice presentazion di libris, ma une maniere di stâ dongje, di scoltâsi, di cressi insiemi cuntune pene in man.
◆ Cui che al à assistût ai incuintris al conte simpri la stesse robe: no si trate di leturis intal sens classic, cul autôr sul palc e il public sentât a scoltâ tal cidin. Al è plui che altri un cantîr viert, dulà che si spieghe cemût che al nas un progjet corâl, ce che al vûl dî pardabon costruî comunitât cul scrivi, e dulà che lis domandis dal public a contin tant che lis peraulis di cui che al presente. Une maniere di fâ culture che e somee tant al Friûl stes: pôc solen, une vore concret, e bon di trasformâ une serade fra forescj intune storie condividude.
◆ E il viaç al à butât: “Passi d’Inchiostro” al à vût batimans al Salon Internazionâl dal Libri di Turin tal Mai dal 2026. Une conferme che la peraule zovine dal Friûl, cuant che e cjamine fûr des sôs valadis, e sa a fâsi sintî ancje dulà che nissun si spietave di cjatâle. Dopo di chest prin grant preseament, il progjet no si è fermât: al à cjatât la sô prime tape fûr dal confin propit a Viene, dulà che, tal mês di Jugn, un public di apassionâts dal Friûl al scoltave cul flât sospindût i doi poetis Trentin e Bozzetti, che a contavin di cheste lôr aventure. Cussì “Passi d’inchiostro” si è fat sintî, pe prime volte, ancje fûr de Italie.
Parcè che al è propit chest il sens plui profont dal progjet: Une lenghe piçule, se e vûl, e pues cjapâ un pas che no si ferme.
◆ Al è alc, in dut chest, che al somee une lezion tant par chei che il Friûl lu vivin di dentri, tant par chei che lu cjalin di difûr: la lenghe furlane e à di jessi lassade semplicementri libare di lavorâ, di contâ, di sbaliâ, di inamorâsi. Propit come che a fasin chescj 65 zovins autôrs. E je une idee di identitât che no cjale al passât cun nostalgjie, ma al presint cun curiositât, e al futûr cu la fiducie di cui che al sa che lis propris lidrîs, se a son veris, a tegnin ancje il viaç plui lunc. E se un dì “Passi d’Inchiostro” al à di fâ tape intune altre citât, intun altri continent, al sarà dome la conferme che il pas, dopo tacât, nol cognòs plui confins.
◆ Par cui che al vûl seguî di dongje chest côr di vôs, savê cuant che e rive une gnove tape, comprâ il librut o dome scuvierzi di plui sui autôrs e sui progjets, si pues visitâ il sît www.scrittorifvg.it o stâ daûr al profîl Instagram @passidinchiostro. ❚