“In tal ufizzi – spaziôs e moderno – de Imprese di Jaroni: machine di scrivi, scritori cul telefono, banc di dissen, poltronis, vâs di rosis ca e là. La parêt di fons ‘e je une ramade a dute lungjezze ma, in cheste prime part, culis tendis siaradis”.
◆ E je la opare che e à vût il prin premi intal concors di teatri bandît de Filologjiche intal 1975.
La azion si davuelç dai 21 ai 26 di Jugn dal 1975, nus vise l’autôr in esergo. Il contest al è propit chel, vâl a dî l’an de avanzade dai partîts di çampe intes elezions aministrativis. Plui in gjenerâl, al è il periodi là che al è ancjemò vîf il scjas fat in Friûl de mozion firmade di 529 predis de arcidiocesi di Udin par domandâ un rinovament fuart de Glesie a pro dal popul furlan; e al jere ancje il timp des manifestazions popolârs par domandâ la istituzion de Universitât dal Friûl. Dutis chestis circostanziis si lis cjate inte vicende dai sîs personaçs: un imprenditôr che si à fat di bessôl, dut cjapât dal lavôr fin a trascurâ la famee, la sô femine, lis dôs fiis, un avocat e un consulent de aziende che al è ancje assessôr e che di lui o savìn no dome ce che al dîs, ma ancje ce che al pense. La part plui vivarose e gjoldibile e je la prime, li che i contrascj fra lis personis a son presentâts cun snait e buine caraterizazion psicologjiche. Inte seconde part, si capìs subit che aromai si inviisi bande di une happy end che inte prime part e pareve impussibile: l’imprenditôr si dismole, al rinunzie a un afâr e si met parfin a regalâ un teren ae comunitât; e, ancjemò plui impuartant, si met a cjalâ une rose che i ricuarde il fat di vê une femine che i vûl ben. La fie che si veve sierade in se par vie di une delusion di amôr, si dismole ancje jê e e finìs par rindisi ae cort dal consulent. Chê altre fie un morôs lu à za, l’avocat comunist, e insiemi a laran indevant a manifestâ pai dirits des feminis e dal popul furlan ancje a risi di cjapâlis une altre volte e di becâsi une denunzie.
La trame no je tant origjinâl, ma la opare e à il merit di piturâ une situazion storiche cun sgrimie e precision, cjalantle di dôs bandis: chê dai benpensants che no acetin i cambiaments intai rapuarts sociâi e chê di chei che, invezit, no acetin di tasê e di stâ simpri cuços a lassâsi tignî jù di bande dal podê. ❚
