Partecipazion sintude pe iniziative social “#fûrlabandiere!”

Ancje se sierâts in cjase, chest an o vin vude la pussibilitât di viazâ in maniere virtuâl ator pal Friûl e pal mont, doprant il schermi dal computer tant che un barcon par gjoldisi il spetacul di cîi, placis e teracis piturâts di zâl e di blu (cun cualchi ponte di ros, par chei che a àn doprade la bandiere “di vuere”, come che le àn clamade), in gracie de iniziative “Colorìn il Friûl di zâl e di blu #stinacjase ma metìn #fûrlabandiere!”, metude in pîts de Agjenzie Regjonâl pe Lenghe Furlane e dal Messaggero Veneto, in colaborazion cul Comun di Udin, cul Istitût Ladin Furlan “Pre Checo Placerean”, cul grup Facebook “Achì, si scrîf e si rît NOME par furlan (e par cjargnel)!” e, nancje dîlu, cul nestri sfuei.
◆ La propueste di meti fûr la bandiere e di mandâ une fotografie ae direzion di pueste eletroniche dal Sportel linguistic regjonâl e je stade cjapade sù cun entusiasim e cun cetante braùre di bande des acuilis di ducj i cjantons dal Friûl e no dome, viodût che al apel a àn rispuindût ancje tancj furlans ator pe Italie e tal forest, tant che chei sparniçâts in Argjentine, France, Gjermanie, Brasîl, Canadà o tai Stâts Unîts. A son rivadis dibot 500 imagjins (493, pe precision), la plui part compagnadis di messaçs di svant, di sperance o di salût, che a son stadis publicadis su lis pagjinis dal Messaggero Veneto e sul sît de ARLeF (https://arlef.it/lis-bandieris-de-fieste-de-patrie-2020). A ducj i partecipants ur è stât mandât vie pueste eletroniche un atestât di partecipazion ae iniziative, une vore preseât di bande de int.
Plui di cualchidun, no vint la bandiere a puartade di man e no rivant a cumbinândi une par timp, si è inzegnât cun maiutis o, magari cussì no, cun mascarutis, cun rosutis zalis e blu, zuguts o dissens piturâts cui colôrs dal Friûl o fintremai cun supuarts digjitâi o cun creazions sul savalon. Al è stât ancje cui che al à ideât il motîf “Friûl” pe imagjin di profîl di Facebook cu la bandiere furlane sul fonts.
◆ Al va dit che tancj di lôr a àn vût miôr publicâ la fotografie sui social, ma in maniere privade, doprant dome i hashtag di riferiment #fûrlabandiere e #fiestedepatrie2020.
◆ La iniziative, dut câs, e je stade pardabon un sucès, e no dome par vie dai numars, ma soredut parcè che nus à mostrât che, intun moment cussì delicât, il nestri spirt di comunitât al è ben salt: ancje se lontans, par une volte no sin restâts di bessôi.  ❚