Par television la marilenghe e je plui presinte, ma no je simpri facil di viodi (o riviodi)

Il nestri avignî al sarà segnât simpri mancul dal casselot. Stant ai dâts tirâts sù a Novembar intal sest rapuart Auditel-Censis, di fat, a son simpri mancul lis fameis dotadis di une television tradizionâl (il 36,9% di chest an rispiet al 71,4% dal 2017), a pet di un numar simpri plui alt di smart TV e di abonaments su altris imprescj digjitâi (smartphone, tablet e v.i.). Dal rest, ancje lis smorseadis aes percentuâls di scolte, cun pontis simpri plui debilis, nus fasin capî che la int e à alc altri di miôr ce fâ, invezit di restâ a cjalâ programs simpri plui dominâts dal scjas de spetacolarizazion, dal berli dal sensazionalisim o dai vanzums de futilitât.
◆ Par fortune, nus vignarès di dî, ancje se in veretât si spere che i spetatôrs furlans a tignedin bot ancjemò, stant che di cualchi timp il palinsest locâl e statâl al è daûr a dâi simpri plui spazi a trasmissions in lenghe furlane che al sarès un pecjât pierdilis, ancje parcè che no si cjatin in altrò.
◆ In gracie des concuistis faturosis fatis intai ultins agns, di fat, dongje dai programs radiofonics, cumò al è pussibil vê ancje un spazi di pueste te programazion publiche, ven a stâi Rai trê bis, sul canâl 810 dal digjitâl terestri, ancje se lis 40 oris ad an di trasmission pal furlan a fasin un pôc ridi a pet des 100 previodudis pal ladin. Une gnove che e je stade pandude masse pôc, no cate il spot di Antonello Dose (chel di “Il ruggito del coniglio”), che però al è stât mandât in onde par un timp masse limitât par che la int e vedi tignût ad a ments il messaç.
◆ E al somee di jessi i solits barufants, a fâ notâ che dentri di chest numar a vegnin considerâts ancje i cartons animâts, che biadelore la ufierte par fruts e je simpri plui largje, ma forsit alore al sarès pardabon il câs di incressi il numar di oris, che intun an cui programs pai grancj si rive a malistent a cuvierzi une ore ogni dôs setemanis, duncje pardabon une miserie. E forsit o sin cragnins a zontâ che la programazion par furlan e je trasmetude dome di martars (dopomisdì pai fruts e la sere pai grancj), cun replichis di vinars. E no stin a jessi cussì massepassûts di lassâsi scjampâ che l’orari de programazion serâl (21.20) nol ven mai rispietât, cun ritarts ancje di miezore su la scjalute.
◆ Sì, forsit o sin pardabon malegraciôs, ancje parcè che o cognossìn ben lis personis che a lavorin te nestre sede Rai e o savìn la passion e la fature che i metin tal lôr lavôr. Magari cussì no, o sin cussients ancje dal fat che tancj colaboradôrs aromai storics a patissin cundizions contratuâls masse balarinis, no cate il finanziament di un milion di euros metût a disposizion ogni an pe programazion radiofoniche (150 oris ad an) e televisive in lenghe furlane, in plui di savê che buine part des trasmissions che a van in onde a vegnin compradis di altris cjasis di produzion (ancje cu la poie di fonts regjonâi).
◆ Dut câs, no podìn fâ di mancul di marcâ che i progrès a son daûr a fâsi viodi, e ancje cun cualitât une vore buine. Tai mês che a vignaran si viodarà cemût che e larà cul contrat di servizi gnûf, si ben che il slargjâsi des trasmissions ancje ae lenghe arbëreshe pe regjon Calabrie al lasse intindi une posizion clare tai confronts de valorizazion des lenghis minorizadis presintis tal teritori talian. La nestre zonte regjonâl, dal rest, e à za sigurât il so interessament par monitorâ la situazion e par sburtâ ancje ae digjitalizazion des techis, ma soredut pe creazion di une redazion gjornalistiche pe lenghe furlane, daûr di ce che al esist za pe programazion slovene.
◆ Par chei che invezit a preferissin altris rêts televisivis, tal principi dal 2023 Telefriuli e à presentât il progjet “La Tv dai furlans”, cun ducj i programs par furlan metûts a disposizion “on demand” sul canâl 11 dal digjitâl terestri. La sezion dedicade intal sît internet e mostre i titui des trasmissions e lis pontadis archiviadis: lis “Gnovis”, o ben il telegjornâl par furlan che al va in onde aes 20.40, “Maman”, la trasmission di Daria Miani indreçade ai fruts (progjet ARLeF), “Telefruts”, il spazi pai cartons animâts (finanziâts de ARLeF), “Un pinsîr par vuê” e “La peraule de domenie” par cure di pre Rizieri De Tina, YoupalTubo, cui zovins youtubers (simpri progjet ARLeF), Taj Break cun Catine e Gianpacco e Viaç in Friûl (un altri progjet ARLeF).
◆ No stin a dismenteâsi di Video Tele Carnia, altre emitente storiche che dal 1980 e conte storie, culture e personaçs de Cjargne e che di cualchi timp, daspò di un moment une vore cruziât, si pues viodile sul canâl 80 dal digjitâl terestri (90 par Sapade e provincie di Belum), in condivision cun Teleantenna di Monfalcon, o ancje in streaming.
Esemplis che nus fasin capî che progjets e interès in chest setôr a ‘nd è, ancje a nivel economic. Forsit e mancje un tic di informazion in plui, ma cun chest articul o sperìn di fâ ancje noaltris la nestre part.
Il Friûl di scuvierzi sul 810
In trê agns di ativitât, il servizi televisîf de RAI al à mandât in onde dute une schirie di trasmissions par furlan, intal imprin lant a recuperâ intai scansei produzions di agns indaûr (che al merete dut câs di tornâ a viodilis), par dopo dedicâsi ae ricercje e ae sperimentazion di programs origjinâi cun chê di svicinâ il public ae lenghe ma soredut ae culture dal teritori. Dongje dai cartons animâts dal dopomisdì, te fasse serâl si à cussì podût gjoldi di documentaris, cines, docufictions, spetacui teatrâi, servizis culturâi, seriis dedicadis ae universitât, al mont dal lavôr, aes particolaritâts gjeografichis, in plui di produzions che a cimiin ai zovins. Une sorte di barcon viert sul Friûl par presentâ lis tradizions e lis inovazions, par contâ la nature, la economie, la storie, la art, la int e i personaçs intune lenghe minoritarie vive e che si trasforme.
◆ Lant a dâ un cuc ai programs di chest an (cence pretindi di rivâ a nomenâju ducj), si puedin ricuardâ il documentari dedicât ai 70 agns di Ente Friuli nel Mondo (“Ent Friûl tal mont. Une patrie cence confins” par cure di Antonio Pillosio), o il prodot di animazion pai 60 agns de tragjedie dal Vaiont (“Ti conti il Vaiont”, par cure de Societât Filologjiche Furlane), o ben il speciâl su SUNS Europe, il festival des arts intes lenghis minorizadis (par cure di Marco D’Agostini). E po dopo, a son dutis lis pirulis artistichis firmadis di Antonia Pillosio (sul templut langobart di Cividât, sul Museu Diocesan di Art Sacre di Pordenon, su la mostre “Insieme” a Cjase Cavazzini, o sul Centri Servizis pai Boscs e lis ativitâts de mont di Paluce) o chês culturâls e teatrâls par cure di Arianna Zani (“Tasting academy. De tace ae tiere”, “Il cavalîr al à il non cun se”, o “In Viaç cu Lis pantianis e la machine dal timp”), che e à curât ancje il program par fantats “Zuìn di nature”, cun protagoniscj Carolina Zannier e i siei fruts.
◆ Tornant su lis produzions esternis, no si pues no restâ inmagâts a cjalâ i documentaris naturalistics di Ivo Pecile e Marco Virgilio (“Vierte tes culinis morenichis”, “Udin, la nature scuindude in citât”, “Cucagne fra i cjiscjei de pedemontane”, “Crosis – La dighe e il salt di aghe”, “Vilefrede il borc de Ete di Mieç”, cence dismenteâ lis tantis trasmissions su lis nestris vals e i cjanâi), che si son dedicâts ancje ae art peade al teritori (“La Art ispirade de Nature”).
◆ Particolâr “Key di mont”, il progjet in dîs pontadis di Giorgio Cantoni indreçât ai zovins, cul musicist Doro Gjat e cun Mary Jane, youtuber furlane che e vîf a New York, cun chê di mostrâ che la nestre tiere e je un puest magnific che nol à nuie ce invidiâ a lûcs plui innomenâts. Simpri di Giorgio Cantoni, e je daûr a lâ in onde la trasmission in cinc pontadis “Aganis”, li che, lant daûr des figuris mitologjichis dal titul, la condutore Marianna Tonelli nus mene ae scuvierte di flums e di puescj inmò no tocjâts dal om, simpri cuntune vision feminine e cuntun voli al passât e al avignî.
◆ Par restâ suntune formazion dute colôr di rose, no si pues no ricuardâ “Feminis” e “Altris feminis”, par cure di Dorino Minigutti (produzion Agherose), che al à ancje ideât la trasmission “Si vîf”, dedicade al musicist Gigi Maieron.
Fevelant di musiche, al è stât trasmetût ancje “DLENG – musiche classiche ma no masse” di V!dee, cuntun biel imbinament di musiche, art, culture e teritori.
◆ Cu la regjie di Marco D’Agostini, invezit, e je lade in onde une trasmission in dîs pontadis dedicade al mont de ricercje in universitât, cul titul “Snait. Ricercje e istruzion in Academie”. Ore presint, simpri par cure dal stes regjist, e je in programazion la serie “Int in vore. Il mont dal lavôr in Friûl”, un formât televisîf ideât par presentâ lis ecelencis imprenditoriâls dal teritori furlan.
◆ In curt, dut il materiâl al varès di jessi cjamât su la plateforme Raiplay. Par intant, restait in vuaite il martars e il vinars di sere, tor 9 e mieze, su Rai trê bis: o ‘nt viodarês pardabon di bielis (biadelore)! ❚