Sfuei Mensîl Furlan Indipendent
Archivi de Patrie

Paolo Forte al conte il so Friûl “Al Buio”

Moira Pezzetta

MUSICHE

«No je tiere che o ami di plui», al dîs. Cu la sô armoniche al à za incantesemade dute Europe

No coventin tantis peraulis cuant che si scolte la sô musiche. Une musiche che e trasmet furlanetât: fie di cheste tiere, lenghe, tradizion e culture, fie di un miscliçot. «O soi un mignestron», nus conte Paolo Forte, musicist de anade 1988, di mari siciliane ma nassût e cressût in Friûl, che cu la sô armoniche al à za incantesemade dute Europe. «No je tiere che o ami di plui dal Friûl, e o cîr propit di contâ lis emozions che cheste tiere e pues regalâ in ogni note».

La storie musicâl di chest zovin artist e tache a 8 agns, cuant che par câs la agne i regale une armoniche zugatul, e lui nol à plui smetût di sunâle. Cul supuart dai gjenitôrs e tante passion, e je tacade le aventure di Paolo. Agns di conservatori, viaçs, esperiencis musicâls di ogni gjenar tra etnic, folk e suns de tradizion i àn insegnât a vivi la musiche fin di piçul.

«I prins agns mi vergognavi un pôc di sunâ la armoniche. E je ancjemò viodude tant che un strument par vecjos di ostarie, e par chest o sunavi a cjase cence contâlu ator. Par sbrocâ la mê voie di musiche o vevi tacât a sunâ il bas eletric, e chel par prin mi à puartât sul palc. Al conservatori o ai studiât ancje il piano che o ai amât dal moment, forsit plui de armoniche, e o soi lât indenant a sunâlu sperimentant lis mês gnovis ideis. Planc a planc, o ai tacât a esibîmi cu la mê armoniche in situazions popolârs, parcè che o sintivi la dibisugne di fevelâ une mê “lenghe”, sunant ce che o vevi tal cjâf e sperimentant musichis diviersis».

Il so viaç musicâl lu à puartât a esibîsi tai festivals internazionâi plui impuartants, in plui che in Italie ancje in Austrie, Ongjarie, Bosnie-Erzegovine, France e Portugal, e al à acompagnât artiscj tant che Luigi Maieron, Mauro Corona, Irene Fornaciari, Bruno Pizzul, Roberto Vecchioni e Moni Ovadia.

Al atîf al à tantis colaborazions cun musiciscj, poetis e grups musicâi; nol è però cognossût dome tal mont de musiche, ma ancje in chel dal palc teatrâl di Italie e Svuizare. Al à recitât e fat spetacui cun Claudio Moretti, Alessandro Conte e Alberto De Bastiani.

«Mi plâs stâ in sene. Chest al vûl di jentrâ tal ambient che si sta creant, cu la musiche e cul cuarp. A son diviers spetacui dulà che o reciti, o forsit al è plui coret dî che o fâs la part di me stes cence recitâ, cence fâ finte di jessi atôr, parcè che o sai di no jessilu. Dut chest si tradûs in sinceritât e in divertiment».

Lis cjançons che plui i stan a cûr a son chês improvisadis, chês che no si ricuarde, ambientadis in lûcs metafisics, che a gjavin il respîr.

Un dai tocs che plui di ducj al fâs di spieli al so anim al è propit “Al Buio”, l’ultin dai 9 tocs dal so album. Jessût al principi dal 2018, il so prin Cd di solist auto produsût al puarte il titul “Al Buio” parcè che, come che nus conte Paolo, nol è puest miôr par sunâ che tal scûr, dulà che il voli nol è distrat e dulà che al è facil astraisi intune altre dimension. Al è il lûc plui intim che al esisti. «No sierìno forsit i voi cuant che o provìn lis emozions plui intensis?»

Oltri a tancj concierts, recitis in teatri e ae presentazion dal so gnûf album, Paolo al sta acompagnant Agnul Floramo in spetacui gjavâts dal libri “Cuintristorie de prime vuere mondiâl”, publicât de clape di culture Patrie dal Friûl, dulà che si conte la storie de prime vuere mondiâl viodude dai furlans, separâts di un confin che al à profanade crudelmentri la identitât e la coesion nazionâl. Di cheste biele esperience, nus conte Paolo: «Agnul al è une des plui bielis personis che o cognòs. La sô peraule e je musiche, e je amôr che si tocje cu lis mans e mi plâs di murî pierdimi cu la mê musiche dentri dal so mont. Cuant che al fevele al è un liron che al sune e che ti ipnotize».

Ancje chest an, lu viodarìn ator par dut il Friûl, ma ancje di là dai confins. Tal cjalderon però, come che nus spie, e bol za une biele idee, un sium che al à di simpri: un viaç video musicâl leterari tai lûcs che “no esistin”, ma che a son in Friûl.

Sul sît www.paolofisa.it  e su la pagjine FB “Paolo Forte fisarmonicista&fisarmonicante” si puedin cjatâ imagjins, videos e ducj i apontaments di chest zovin artist che al fâs vignî i sgrisui ae prime note.

di Moira Pezzetta

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +