MUSICHE
Neo Folk
La stampe e à inventât par lôr il gjenar neo folk e lôr, parafrasant Lino Straulino, a disin di jessi “col cul sentât in Friûl e co i vuois cjalant ator pal mont”.
Di Pordenon, un grup che al cjante par furlan di storiis e contis des Vals de Ciline, de Cjarnie, dal Friûl. A son i Bràul, che tal 2017 – tal an dal vinçesim aniversari de lôr nassite – a son tornâts a dâsi dongje. Il lôr public nol è mai stât tant content e chest si è podût viodi al Folkest dal an passât, cuant che – te curnîs di Dartigne – Andrea del Favero, diretôr artistic di Folkest e coprodutôr dai ultims doi cd, al à anunziade la gnove aventure dal grup.
I Bràul a son: Lucia Clonfero, Giacomo Traina, Gabriella De Cesco, Claudio Mazzer e Claudio Mucin, acompagnâts des lôr ghitaris acustichis, bouzouki, percussions, violins classics, eletrics e violins bas, viole, flauts e la lôr vôs.
La storie dal grup e tache tal 1993 cuant che, tant che musiciscj apassionâts di suns celtics, irlandês e bretonis, si cjatin a componi tocs che a misclicin i gjenars fin a creâ un stîl dut gnûf. Dopo il debut al Folkest tal ’97, i artiscj a proponin il prin cd “La corte di Lunas” che al vinç il Premi “Morèt D’Aur” tant che miôr cd folk dal an. «Ancje se daspò o vin fats altris 2 cd che par nô a son tant plui bogns, viodude la maturitât artistiche e culturâl che a dimostrin, il prin album al continue a jessi il plui preseât dal public dopo vincj agns».
Dopo jessisi fats cognossi fûr regjon e in Italie, a son stâts finaliscj e vincidôrs ex-aequo al Folkontest di Casale Monferrato tal ’99. Cul gnûf album dal 2001 “Ciaràndis” e i suns che si ispirin ae tradizion folcloristiche furlane, il grup si fâs cognossi ancje tal forest, de Gran Bretagne al Portugal e adiriture fin in Malesie.
Cun “La farina dal diàul” dal 2005, la energjie, la maturitât e la estension musicâl des gnovis melodiis a son ricognossudis in dut il mont, tant che i Bràul a vegnin contatâts par fâ concierts di ogni bande.
«O vin tantis sodisfazions e soredut tancj amîs in dut il mont, tant che Balen Lopez de Munain e Luis Delgado, o il grup israelian Esta, i bretons Blezi Ruz, i Fratelli Mancuso e tancj altris. No podìn dismenteâ la biele cene e fevelade che o vin vût cun Carlos Nuñez».
A stan za lavorant ae prossime creazion: un cd concept album che al celebre il Friûl e i furlans cun tocs basâts su storiis, scrits e contis de tradizion. «Al è ancjemò dut top secret – come che nus contin ridint -, il titul al podarès jessi “Vous dai libris”».
I Bràul a son za stâts invidâts a Arcipelaghi Sonori in Provincie di Modene, li che si esibiran in curt, e di gnûf sul palc dal Folkest e sui palcs di dute Europe fin a Londre.
www.facebook.com/BraulFriuli al è il portâl dulà che si cjatin fotos, videos, novitâts e dute la simpatie di chest grup che al à scrit e che al torne a scrivi la storie de cjançon furlane. Par cui che al à voie di dâur une man, a stan cirint cualchidun par imbastî il lôr gnûf sît web.
di Moira Pezzetta
