PAN…em et circenses. L’aniversari des Frecis parsore il Friûl di Mieç

Panem et circenses: o podaressin fâ cussì il struc de manifestazion de Patulie Acrobatiche Nazionâl tes zornadis dai 5 e 6 di Setembar. Un grumon di int par viodi i avions di vuere che a coloravin il cîl parsore il Friûl di Mieç.
UCIEI PERICOLÔS
A Visepente plui di cualchidun, che di PAN a ‘nd àn fin parsore i cjavei, al zirave cu lis scufis anti rumôr par podê “vivi” a cjase sô. In cheste fotografie si cjate la fonde dal NO dal comitât No AMX che dal 1993 si bat par vê un cîl libar di chei uciei pericolôs e sporcacjons.
Cui isal il “paron” de tiere? La int o lis servitûts militârs? Il 1989 al segne le storie, i blocs militârs e ideologjics si son fruçâts e tal nestri Friûl lis casermis che a varessin vût di fermâ la invasion bolseviche e presidiâ la tiere brusade che al sarès deventât il nestri mont, a son sparidis tant che la rosade al prin soreli.
E pûr, za tal 1967 te Mozion dal Clericât, si domandave al Stât Talian di considerâ l’impat che lis servitûts militârs a vevin sul teritori. Une elare di vuere scjafoiant che e profumave di reson di stât, ma no di reson di umanitât. La int no veve futûr tun mont indulà che la imprese no veve spazi par vie dal mont militâr.
Chest tocut di storie par dî che metisi cuintri a chê presince e je une des fondis de reson autonomiste locâl.
LA BANDE JUSTE
Nol è un sindic dai comuns di Basilian, Listize, Bertiûl e Codroip che al vedi scrupulât il pinsîr se cjapâ la posizion dai lôr paisans e aministrâts o bati lis mans ai avions che a zirin su lis cjasis dai lôr paîs. La bande juste no je chê dai piçui, ma chê indulà che a son lis autoritâts che a vegnin fotografadis e metudis sui gjornâi o telegjornâi. Cemût si puedial pensâ che a nivei pui alts al rivi il dirit di jessi tutelâts a cjase nestre?
SFOLÂTS
In chei dîs achì, i gjornâi a àn puartade la notizie che par resons di sigurece a àn sfolât (a cjase dai parincj) une ventine di lôr de zone di pericul. Une amission di colpe, ma ancje di omission, parcè che za passantdoman nissun al cjaparà nissun proviodiment. Se o vês dubis, provait a passâ par Visepente, Bean o Vilecjaze, o lait a viodi la pagjine Facebook dal comitât.
Mi àn vût dit che se a gjavin lis Frecis in Friûl nol reste pui nuie, jo o ai vût rispuindût che a chel pont za no àn plui nuie se no son stâts in stât di cirî une fonde storiche, culturâl, linguistiche e antropologjiche. Un om cence muse si cuvierzarà simpri di mascaris fabricadis di altris.
Par chel, nô o nin a Rivolt ogni prin sabide dal mês, par visâ che li al esist  l’om, une dignitât e une fonde fûr de propagande che infume dut, e che al prove a piulâ un NO tun mâr di SÌ. ❚
Comitât NO AMX (MDS)