Autonomie: ma dulà?

Chi di nô si respire
nome sotanance
e pôre di mostrâ la muse
Fermait un furlan pe strade, un a câs, Toni Crucul o Kevin Colaut, e provait a domandâi: “ce vuelial dî che o sin une Regjon autonome?”.
Sul so cerneli si stampe un pont di domande grant come une cjoscje di rôl.
◆ Cumò cjapait cent furlans, o mil furlans o magari ancjemò ancje, e fasêt chê domande compagne.
Rispueste: un cei di beât, un cjalâ di cherubin e un music di serafin.
Insome, nancje jo che o soi furlan patoc no sai ce che al vûl dî.
Di ce si capissial che o sin autonoms?
◆ A scuele a disevin che la Sicilie e la Sardegne a son Regjons autonomis parcè che a son isulis. Insome, al è par vie dal mâr.
La Val di Aoste, nus disevin, e je autonome parcè che li si fevele francês. Jo no ai mai sintût a fevelâ francês in Aoste, al è plui facil cjatâ cualchidun che al fevele furlan a Udin.
◆ Ma, insome, alore, e sarà une cuistion di lenghe. In efiets, in Alto Adige (lôr lu clami diferent, ma lassìn stâ) si fevele un dialet todesc, e la provincie di Bolzan e je autonome. Però la provincie di Trent e je autonome chel compagn, ma sul Trentin si fevele un dialet, simpri facil di capî, che al tire un fregul a lombart e cetant a venit, ven a stâi un dialet talian spudât.
E alore?
Nus disevin che la nestre regjon e je (a scuele mi disevin “e sarà”) autonome parcè che e je “sui confins”. Sui confins dal mont comunist. Alore une cuistion militâr?
◆ A disevin ancje che o vin “minorancis”, chê slave e chê todescje, e alore la regjon e varès di sei Regjon autonome. Ma alore no bastavial dâ autonomie linguistiche a saurans, tamavês, roseans, beneçans e cjarsulins? Invezit nome i cjarsulins a àn scuelis par sloven.
◆ A 19 agns o vevi simpatie, nancje di dîlu, pal Moviment Friûl. Cui compagns di classe che no jerin democristians, ven a stâi doi trê di lôr, si fevelonave di plui autonomie e, nancje di dîlu, de prepotence triestine.
◆ Un professôr, cuant che si è stufât di scoltânus, nus e à poiade cussì: “Sù mo fruts, ce volêso tant cjacaronâ, se nol fos stât pai triestins la nestre Regjon no sarès mai nassude. Se al fos stât pai furlans no varessin no nome une Regjon autonome, ma nancje une Regjon”.
Insome come la DOP dal formadi Montâs: se no jerin i venits nissun furlan si çugnave.
◆ E chel professôr al saveve ce che al diseve, che al jere ben logât tal butiçon de Balene blancje.
Insome o vin capît a pro di ce, e di cui, che e je nassude la nestre Regjon.
O ai però ancjemò di capî dulà che e je autonome.
Te sanitât? Come dutis chês altris Regjons. Mi ven di ridi, o di vaî, a viodi i “governadôrs” talians (peraule inventade di cualchi gjornalist zugatulon) in cheste pandemie: plui dûl che rabie.
Te agriculture? Tant par travasâ i bêçs di Bruxelles, che a saressin nestris, intun deliri burocratic plui delirant di chês altris Regjons?
Te scuele? La scuele e varès di sei par furlan e par mandarin, no par talian e par inglês: covential tant a capîle?
◆ Se tu vâs sul Trentin la autonomie tu le respiris cul aiar fresculin di chei paîs. Chi di nô, va ben che i furlans a àn rispiet ancje a tirâ flât, ma si respire nome sotanance e pôre di mostrâ la muse, si busine sot la nape, si maledissin i neris, si tirin jù lis toniis al guvier, ma nissun po dî “o ai fat, o no fat, cheste robe parcè che o sin autonoms”. E no ai mai sintût un politic a sglonfâ la bufule de autonomie, a valêsi de autonomie, a braurâsi de autonomie. Come se e fos une vergogne: ven a stâi che si vergognisi di ce che no si à.
◆ I nestris sorestants a son la copie di chei talians, copie cun tante sudizion, altri che autonomie, altri che sovranisim. Jo no ai mai sintût il sproc “prime i furlans”. No mi plasarès di sintîlu se al reste çondar, e se cui che lu dîs al è çondar, ma se tu i folcjis dentri agriculture, scuele, salût, culture… ah, ben, alore si po discuti.
Ma ce vino di fâ? Domandâi plui autonomie a Rome al è timp pierdût.
Si po fâ une politiche di sest ancje se no si à autonomie.
◆ Ma jo, magari cussì no, no rivi a viodi ce che a àn tal cjâf i nestris sorestants (no nome i politics, ancje e massime chei altris). Lant a palpe, e gjavant cualchi fros de mede ben folcjade e ben scuindude de informazion regjonâl, e scaturìs une peraule: infrastruturis. Vignarès a stâi puart e autostradis. Jo o capìs che un imperi al vedi vût di fâ un grant puart, ma al jere un imperi! Che al sedi stât ancje un svindic di Triest tai confronts di Vignesie al fâs part de nemesi storiche e no de economie.
◆ Ma cumò al è come fâ il cuviert prime des fondis. Cun ce vino di cjamâ i containers? Ma vêso mai viodût une nâf puartecontainers? Cu la soie furlane?
Un cargo plen di soie al ten 52.000 toneladis, cun chê furlane si puedin jemplâ 5 cargos; e dopo? Metìn ancje la blave e fasìn altris 6 nâfs, e dopo? Cussì, cuant che o vin mandât in Cine dute la nestre blave e dute la nestre soie nus torne indaûr cualchi cargo frigo di cjar purcine: di ce fâ persuts e salams furlans “ecelencis dal teritori”. Si po simpri provâ a vendiju ai cinês.
◆ No son robis di ridi. Se su la A4 a passin 13 milions di TIRs ad an e al è di cjapâ un spac par cemût che o vin sdramassât tiere e arie e aghis e vite animâl. Cence che nus vegni un boro tal tacuin.
◆ Saressie cheste la autonomie? E che cualchidun mi dimostri cemût che lis “infrastruturis” a fasaressin cressi il Friûl. Cressi in peton e asfalt? Par cui? L’artesanât, la industrie mi disarês… e jo us dîs che nol covente un bo par tirâ un barelin.
O vin pocje tiere, doprìnle ben e a nestri pro. Cheste e je la autonomie.❚