Pai 3 di Avrîl la Patrie dal Friûl e premie i vincidôrs dal Concors fotografic

Il program definitîf de Fieste dal Friûl dal 2014 al è cuasi pront, par cognossi i ultins inzornaments al è ben tignî di voli il sît www.provincia.udine.it.
Ma dal sigûr si pues za anticipâ cualchi apontament che chest an e torne in provincie di Pordenon, e in particolâr a Cjavàs, Midun e Fane dulà che domenie a buinore ai 6 di Avrîl si celebraran la messe par furlan e la cerimonie rievocative cu la leture de bole imperiâl di Indrì IV, il document che al segne la nassite dal Stât patriarcjâl dal 1077.
Ancje La Patrie dal Friûl e je stade invidade ae taule organizative cun Provinciis di Udin e Pordenon, comuns di Udin, Cjavàs, Midun e Fane, Arlef, Istitût Ladin Furlan Pre Checo Placereani, Ufici scolastic regjonâl, la Societât Filologjiche Furlane e lis Associazions La Grame e Vieri Rôl.
In particolâr la nestre riviste e parteciparà al program cu la premiazion dal Concors fotografic “La tô Patrie intun click”. La cerimonie si tignarà joibe ai 3 di Avrîl aes 5 dopomisdì dopo de presentazion de ristampe dal libri di Pieri Piçul (Pietro Londero) “Storie dal popul furlan”.
O ricuardìn che i finaliscj dal concors fotografic a son (in ordin alfabetic):
Sergio Briante di Buie
Martina Borsatti di Pioltello (MI)
Bruno Caldana di Udin
Alessandra Chiandetti di Osôf
Mara Mardero di Glemone
Roberta Michieli di Dedeà (Tavagnà)
Silvia Milocco Sant Vît de Tor
Angelo Moras di Cjampfuarmit
Andrea Tomasin di Mortean
Marco Vidoni di Buie
Giuliano Zelco di Tavagnà
La classifiche finâl e sarà comunicade in chê ocasion.
La Patrie dal Friûl e je ancje in contat cul Comun di Udin che chest an al sarà part ative cu la organizazion di 2 events par celebrâ la Fieste dal Friûl.
No mancje la atenzion pes scuelis, stant che l’Ufici scolasti regjonâl al à inmaneât ancje chest an il concors “Emozions furlanis in viaç pal teritori”, la Societât Filologjiche Furlane e il Comun di Codroip e inmanein une cunvigne “Marilenghe e Mariscuele” e la Provincie di Udin e mandarà par pueste il materiâl informatîf a dutis lis scuelis mediis des provinciis di Gurize, Pordenon e Udin
“L’obietît al è invidâ insegnants e students a rifleti su la impuartance di chê date storiche, 3 di Avrîl dal 1077, che e à segnât l’inizi di une esperience uniche pal Friûl” al comente il president de Provincie di Udin, Pietro Fontanini. ❚
✒ Redazion