PAGJINE TECNOLOGJICHE. Blecs par insegnâ la nestre lenghe ai zovins pal mont

Blecs a son “tocuts”, “ritais”… ma di cumò al è ancje il non dal progjet ideât dal regjist e produtôr Massimo Garlatti-Costa, promovût dal “Ente Friuli nel Mondo” cu la consulence sientifiche de Universitât dal Friûl e il sostegn finanziari de Regjon Autonome Friûl-VJ midiant dal Silce (servizi identitât linguistiche e coregjonâi tal forest). Blecs al è une idee svelte e eficace che e ten cont de tradizion cence retoriche, pensade par «Ufrî une maniere pratiche e golose, la pussibilitât di memorizâ un numar discret di frasis comunis par furlan. Il target de vuide a son i furlans di tierce e cuarte gjenerazion, nassûts e cressûts tal forest che no àn vude, se no ocasionalmentri, la pussibilitât di vê a ce fâ cu la lenghe furlane» al à dite Massimo Garlatti-Costa.



Propit ai zovins furlans ator pal mont si vul dâ une oportunitât par: «Tiessi rapuarts personâi e fâ amicizie, condividi moments di socialitât, esperiencis e progjets; par fâsi ricognossi un pôc furlans o magari vê voie di jessilu. Dulà? Tal lôr Paîs, tai contats cun chei altris di origjin furlane; in Friûl dulà che si ven in vacance o par un periodi di studi, tal forest, tai viaçs e tai incuintris e contats di vore o studi» come che e à dit la Alessandra Burelli de Universitât dal Friûl, zontant che lis espressions di Blecs «A puedin incastonâsi te lenghe plui cognossude di ognidun e segnalâ che si condivît une partignince o la ereditât culturâl leade al furlan; e no di mancul a son un prin pas par imparâ cheste lenghe che ognisun al podarà miorâ te maniere plui oportune».
Lis 24 pontadis di Blecs (si è scomençât a metât di Jugn) a saran cjamadis ogni setemane par 6 mês sul sît di “Ente Friuli nel Mondo” www.friulinelmondo.com e su youtube (www.youtube.it/canaleblecs).
La potenzialitât di chest progjet e je grandonone: traviers la Rêt e la condivisions sui social-media si podaran sgarfâ furlans che fin cumò a vevin sintude lontane la tiere di origjin e lis associazions de diaspore. Dal sigûr la buine sielte di “Ente Friuli nel Mondo” di sostignî la idee di Garlatti-Costa e sarà premiade de partecipazion dai zovins, se dal web si passarà ai leams personâi e sociâi tai Fogolârs: cussì la sperance di tignî alte la bandiere dal Friûl ator pal Mont no sarà plui un utopie.
Tai Blecs la cualitât di produzion je une vore alte, come te lôr semplicitât la senegjadure studiade dai esperts de lenghe furlane de Universitât dal Friûl, cu la consulence di Linda Picco, la musiche, la senografie e i atôrs Martina Zamaro e Igor Pezzi che son stât sielzût par concuistâ i zovins. Fâ lavorâ i zovins par fevelâ cui zovins e je une robe che e somearà normâl, ma e je rare intune societât che si proclame “zovaniliste” ma che e pense e si compuarte in mût conservadôr.
Come che al à dit il President di EFnM Piero Pittaro e auspicât dal President de Provincie di Udin Pietro Fontanini, dopo dai blecs par talian-furlan a vignaran chei par inglês-furlan, spagnûl-furlan  par comunicâ il Friûl al Mont, in maniere ancjemò plui fuarte.
Continuìn cussì, forsit l’Istat al è rivât! ■
Daniele Martina