Onôr ae femine dal ultin puest

Il vanzeli de ultime domenie di Avost al è splendit. Chel che al desidere cognossilu miôr, lu cjate in Luche cjapitul 14 versets 7 – 14. Il struc al è chest: Jesù tun gustâ al vise di metisi tal ultin puest e al racomande che tai gustâs prime di amîs e abenâts, a sedin invidâts puars, strupiâts, çuets e vuarps.
Al vignarès cuasi di dî: «Jesù, la tô e je une pretese balorde e pe int di bon sens no à sens.». Ogni pari te societât al sielç pal fi la miôr scuele e posizion sociâl. Une mari e tignarà simpri vierte la cjase a int che e à rispiet e onôr in paîs, in mût che ancje i fîs si sintin onorâts te publiche opinion.
◆ E pûr, cualchi om / femine a àn cjapadis par veris lis peraulis dal Signôr, a son lâts a cirî i piês tal ultin puest e le àn induvinade.
O pensi a Simone Weil, a Taresie di Calcute, a personis che te mê vite o ai cognossût e soredut a tantis, tantis feminis furlanis di secui incà.
Simone Weil e jere nassude a Parîs tal 1909 e e je muarte in Ingletiere, a Ashford, tal ‘43. Ebree, di famee siore, debile di costituzion, minudine, filosofe, mistiche, lis sôs zornadis a son stadis segnadis par une partecipazion concrete ae vite dai ultins: operaris, pescjadôrs, contadins. Dissepule di studis superiôrs di alt nivel, si è sbassade te esperience de brutalitât dal lavôr di fabriche, e à assistût aes miseriis dai pescjadôrs pitocs dal Portugal, e à savût ce che al vûl dî cjatâsi sot la plombe dal soreli tal lavôr dai cjamps o movisi fra lis citis di une cusine di cjamp militâr. Soredut i pescjadôrs cu la lôr sorevivence croniche le vevin vierte al messaç di Jesù e jê e veve concludût che il Cristianisim e je la religjon dai sclâfs: ogni liberazion di popul, prime che de economie, e partìs, seont jê, dal cjapâ cussience de dignitât de persone umane e i sclâfs a cjatin tal vanzeli il segret de rinassite, de vere liberazion.
Il so rapuartâsi cu la Glesie catoliche al è stât compagn a chel di tante int di vuê: di une bande il mes dal vanzeli ti svicine ae Glesie, di chê altre la istituzion eclesiastiche cu lis sôs regulis ti slontane.
◆ Cussì, fra il Batisim che le varès unide ae Glesie e il sedi dutun cun chei che la jerarchie dal timp e mandave vie, jê e preferive la maledizion dai escludûts prin che la sigurece de salvece te religjon.
No veve di sedi lontane de mentalitât di pape Francesc.
Simone Weil e à vivût pai ultins e cui ultims; savint o no, e à propit sielzût il consei di Crist: Va a metiti tal ultin puest.
◆ Che Taresie di Calcute (1910-1997), intun moment precîs de sô vite, e vedi decidût di metisi fra i pariah de Indie, dut il mont lu sa. Come la Weil, ancje Taresie e je une femine radicâl e determinade tal dâ dignitât a chel che nissun nol tocje, al plui disgraciât bandonât tun cjanton.
◆ Se lant a un incuintri cuntun ministri dal guvier, jê e viôt un miserabil / miserabile pe strade, si ferme, lu jude e e salte l’apontament. Se un al mûr supât dai viers, jê si met dongje e lu cure cun ogni pazience e bontât. E je un sant Francesc che tun unic plat al mangjave il stes bocon dal levrôs. Jê e cridave lis muiniis de sô congregazion che a vevin miôr meti in ordin lis cjartis de burocrazie pluitost che assisti i cuarps plaiâts.
◆ Tai ultins dîs de sô vite e diseve : «Lassaitmi murî come ducj i puars». Il premi Nobel pe pâs dal 1997 al è stât dome il ricognossiment dal dit dal vanzeli che jê e viveve: va a metiti cun chei dal ultin puest.
A son grandis Simone Weil e Taresie di Calcute ma il gno pinsîr al va cumò ae femine furlane metude par secui intal ultin puest; di fat, za il nassi femine e jere une disgracie. La femine furlane, te societât patriarcjâl e devente sierve e protagoniste: te famee, tal paîs, te Glesie, fra i malâts, tal dâ spirt ai vîfs e tal compagnâ i muarts.
◆ Ancje se a son pocjis lis feminis che a restin te nestre storie, ogni paîs al varès di vê un monument ae femine dal ultin scjalin, chê che nissun al cognòs ma che e à sostignût di simpri dute la scjale de vite sociâl.
◆ In Friûl al om i apartegnin i braçs e l’artesanât, la emigrazion, il sudôr des fornâs, lis minieris, i boscs, ma la fadie de vite, maternitât, amôr, afiet, sorevivi fra disgraciis, gloti e vaî di scuindon, avodâsi a sants e santis di miracui impussibii, fin chê altre dì al è stât declinât al feminîl, si clame «femine».
◆ Pierdi memorie di chest, al è spreseâ e dineâ la proprie mari, e al è un delit.
Mi somee che te nestre societât licuide, te famee cence cise di protezion e te Glesie catoliche la femine no je rivade a une sô dignitât e paritât cul om. O sin ancjemò: serie A (oms), serie B (feminis) e serie C (dispatriâts, presonîrs, queer, disfunzionâi al sisteme, scartâts di ogni sorte).
◆ Pe Glesie, al diseve pape Francesc : «La Chiesa è donna. Uno dei grandi peccati che abbiamo avuto è – maschilizzare – la Chiesa» (Udience ae Comission Teologjiche Internazionâl, 30.11.2023).
◆ O sierarès: fra di nô e tal mont, stime, onôr, ricognossince ae femine cence non, cussiente e responsabile vuê come îr, tal so ultin puest.
◆ Ma… Al è masse pôc! Ognidun di nô che si impegni a dâ une man ae persone dal ultin puest, al popul furlan che al è tal ultin puest, no dome cjapant cussience de situazion ma impegnantsi a cambiâle.
◆ Chest, culì e daurman tune societât li che i prepotents a corin in glorie e i ultins a galopin a cessecûl. ❚