Nus à lassât il pitôr Luigi Martinis, poete de Vierte furlane

Al jere il cjantôr dal Friûl contadin, il poete de Vierte furlane pal critic di art Licio Damiani. Luigi Martinis, dean dai pitôrs furlans, al è mancjât ai 7 di Fevrâr. Al veve 91 agns.
Il so mont si infondave tai paisaçs di culine di Seorgnan – in comun di Paulêt -, di Nimis, dal dulintor di Tarcint, puntinâts di cjasâi e tors, incoronâts di arbui, ma ancje tal curtîl di Seorgnan, dulà che il pitôr al jere nassût e al viveve e lavorave.
Preseôs a son stâts i insegnaments di Giovanni Napoleone Pellis e Darmo Brusini.
In Martinis, che al à tacât a dedicâsi ae piture ae fin dai agns Cuarante, «la fragrance de nature si tradûs intun lengaç morbit che al disfe e al rint dolcis tramis di asprece sponzinte, alternât a une palete magre, grese, garbuiade», al scrîf Damiani. Protagoniscj de sene a son spes i lavoradôrs de tiere, impegnâts tes voris di ogni dì e di stagjon o adun, la sere, dongje dal fogolâr. Ma ancje i tapêts di pestelacs e lis infloradis di miluçârs, cjariesârs e baraçs blancs tra vecjos mûrs che a san ancjemò di Invier. Dut, in Martinis, al gote l’amôr pe sô tiere e pe sô int.
Impuartant al è stât il cjapitul de Piture Sacre, a tacâ dal 1951 cul prin incaric di rilêf pe glesie di Ugovize cu la tele dedicate ae Peste dal Sîscent.
Oparis di Martinis a son tes glesiis di Udin, Triest, Vignesie, Reane. ❚
✒ Erika Adami