NO SON PERAULIS PAR VECJOS. Spoiler

_Mandi nono! Vuê o soi propite ledrose. Mi àn spoilerât il gno telefilm favorît.
Spoile-ce?
_Spoilerât. Mi àn fat un spoiler!
Ah, cheste volte no tu mi freis: lu sai ancje jo ce che al è un spoiler. Al è chel aleton che a metin parsore de machine chei che a vuelin fâ i bulos.
_Ma no, nono, no stoi fevelant di chel spoiler li.
Pense che il gno amì Vigji al veve metût un spoiler ancje tal tratôr!
_Nono, scoltimi: o stoi fevelant di cine, di telefilms.
Ma cemût si metie un aleton parsore di un cine?
_Ti stoi disint che al è un altri spoiler, no chel che tu cognossis tu. Si dîs “spoilerâ” cuant che si ruvine a cualchidun il finâl o un toc impuartant di un cine o di un libri, contantlu prime che lui lu viodi.
Come cuant che Bepin mi à dit cemût che jere finide Ajax-Udin. E jo che no vevi nancje tacât la radio par viodile in regjistrade!
_Si, o come se cualchidun ti disès che Dart Fener al è il pari di Luke Skywalker. Âstu presint, no? Chei di Vueris Stelârs.
Cemût? Isal so pari? Chel paiaç cun chê mascare nere?
_Bon lasse pierdi. Dut câs, mi àn spoilerât il telefilm.
E cemût mai no lu vevistu viodût ancjemò? Lu vevistu regjistrât?
_No: no lu àn ancjemò mandât par television.
E cemût àno fat a contâti alc prime che al sucedi?
_Parcè che in Americhe lu fasin viodi prime che in Italie.
E cui isal chest amì american che si divertìs a contâti lis robis a pueste?
_Ma no, no covente jessi in Americhe: i telefilms cumò tu ju puedis cjalâ sul computer, ancje chei che a mostrin dome in Americhe. Dome che o ai let un articul che al contave il finâl de pontade: mi soi spoilerade di bessole!
Biele cheste! Un si pues ancje spoilerâ di bessôl!
_Si, ma a àn sbaliât chei che a àn scrit l’articul. Bisugne meti in grant la peraule “SPOILER” cuant che si conte alc cussì. Ma dulà vâstu cumò, nono?
Mi à clamât il gno amì Vigji a purcitâ. Spoiler: o finarìn cjocs! ❚
✒ Bete Di Spere