NO SON PERAULIS PAR VECJOS. Shatush

Mandi nono!
Mandi, Bete! Cemût?
Avonde ben, nono. Dome che o soi plene di lavôr, no mi reste timp par fâ nuie.
Eh, si viôt: trop isal che no tu vâs dal piruchîr? Cjale li, ce cjavei!
Ce disistu, nono? O soi a pene stade!
Pardabon? Fasiti tornâ indaûr i bêçs daurman, alore!
Parcè po, nono? No ti plasie la mê gnove tinte?
No sai, frute: il colôr al è ancje biel, ma al scomence a metât cjavei. Jerial in strent di tinte, il piruchîr? Vevial voie di sparagnâ?
Ma no, nono: il colôr al è just, al è fat cussì: al è un shatush.
Scjatùs? Isal un colôr?
Ma no, nono, spiete…
Ce robis! Ai miei timps lis tintis a jerin bionde, rosse, more e vonde. O savevi che vuê a àn inventât cent mil colôrs e ju clamin come lis robis di mangjâ: o ai sintût a fevelâ dal colôr cjocolate, caramel, ancje “colôr trape”, une volte. Ma il colôr scjatùs no lu vevi ancjemò mai sintût.
Shatush, nono. Nol è un colôr, al è une tecniche par colorâ.
E ce ti colorino, cul scjatùs? Ce fasino, lu doprino tant che un bigodin? Ma pense tu! E jo che cui scjatùs al plui o piavi il fûc!
Shatush, nono, no scjatùs! Al è propit il non de tecniche. In pratiche, invezit di scomençâ a meti il colôr des lidrîs, si fâs dute une sfumadure che e scomence plui injù, cussì tu âs lis pontis claris e lis lidrîs scuris.
Forsit o ai capît parcè che si clame scjatùs, parcè che e ven fûr une robe dute scussade.
Shatush, nono, shatush!
Sì, bon, ce che al è. Ma almancul par fâ dome metât cjavei, ti fasie paiâ un tic di mancul?
Eh no, nono, fâ une sfumadure al è plui dificil che no fâ une tinte normâl, par chel te fasin paiâ di plui.
Ah, benon, ti fasin une tinte che e somee fate cuatri mês prime, cun dutis lis lidrîs difûr, e cun di plui ti fasin ancje paiâ di plui! Robis di mats.
Al va di mode cussì, nono, ancje lis VIP di Hollywood lu àn dutis.
Ce raze di mode: cjavei colôr blave fas cui scjatùs… altri che fiestis VIP: chel chi al è il “look” perfet par lâ a purcitâ!
di Bete di Spere