Mandi nono.
Mandi frute. Âstu finît di lavorâ cheste setemane?
Sì, nono! Usgnot fieste! O puarti il gno nini al cine.
Ce biel! Ce laiso a viodi?
Il gnûf film dai Pokemon!
Cui, jo? Dulà varessio di pocâ?
Di nissune bande! O feveli dal film dai Pokemon!
No capìs. Isal un cine masse plen di int? Âstu di pocâ par jentrâ a cjapâ il puest?
Ce jentrie il pocâ?
Tu âs dit tu «dai poche, mo!»
Ma no, nono: Pokemon! Il film dai Pokemon!
Si clamie «Dai poche, mo!» il film? Dulà isal ambientât, in pueste intune dì di pension? In une sagre dal frico la sabide di sere?
Pokemon! A son dai personaçs pai fruts.
E cui pochino?
No pochin nissun! Pokemon e ven dal inglês: pocket monsters. Mostris piçui, di sachete.
Ce robis! E parcè si varessie di tignî un mostri inte sachete?
No propite intune sachete, il protagonist ju ten intune bale speciâl, la pokeball.
Une bale che e sburte?
No, une bale par tignî i Pokemon!
E a ce coventino chescj Pokemon?
Tu ju fasis lotâ un cun chel altri. Ognidun al à la sô mosse: un al mande une scjarie eletriche, un al fâs vignî un rogan di fueis…
… un al poche. Cun chel non, a ‘nt sarâ almancul un che al poche, no?
No sai, nono, no ju cognòs ducj. A ‘nd è un grum, ducj diferents.
E a ce coventie fâju lotâ?
Al è come un sport. Ta la storie i personaçs umans a zirin pal mont a cjatâ fûr Pokemon e dopo ju alenin par fâju lotâ. Cui che al vinç al è il plui brâf alenadôr di Pokemon.
No capìs masse il sens di cheste storie.
Forsit parcè che e je nassude come un videogame, nono. Prime a àn fat il zûc eletronic, dopo lis cjartis par zuiâ e il carton animât…
E dopo ce?
E dopo un grum di zûcs, di gadgets… al è dut un marcjât, nono! E i fruts a deventin mats e a vuelin comprâ di dut.
Ma cemût sono fats chescj Pokemon?
A ‘nd è di dutis lis formis. Dispès a somein a un animâl, ma a son ancje Pokemon che a somein a une plante, a un nûl di fum, a un sac des scovacis, o a une calamite.
Ma si clamie Pokemon ancje chel?
Cuâl?
La calamite. Plui che pocâ, e tire. No saressie miôr clamâle Tiremon?
Nono…
Bon, bon, o ai capît. Bon cine, alore! Viôt di rivâ adore in sale, cussì tu cjatis puest cence pocâ nissun! ❚
Bete di Spere
