NO SON PERAULIS PAR VECJOS. Lis gnovis peraulis spiegadis ai nonos
Mandi nono.
Mandi frute, cemût?
Jo ben, nono, gjavant il cjalt e il scjafoiaç.
Eh, e je vere! E pensâ che a Mai o jerin chi a cricâ, cul fûc piât! No si capìs plui nuie cul timp.
Eh, nono: al è colpe dal global warming.
Ben, frute, chel al è sigûr: se tu mangjis vuardi no tu ti judis sigûr a stâ frescje! Magari jerial ancje intune sope?
Ce?
Il vuardi! Lu âstu mangjât inte sope o fat a risot?
Ma no, nono: il global warming!
Il vuardi globâl? Chel di dut il mont? Ce jentrial cul cjalt?
Il global warming, nono, al è il riscjaldament globâl par colpe dai oms.
Cuâi oms? I cogos? Scjaldino il vuardi ducj insiemi? O stin patint il cjalt par colpe des sopis cusinadis in dut il mont?
Ma nol jentre il vuardi, nono! Warming al vûl dî “riscjaldament” par inglês.
Ah! Mi someave strani che il vuardi al fos cussì pericolôs.
A clamin global warming il mudament dal clime di dute la Tiere dal ultin secul, sù par jù.
Po ben, no tu mi disarâs che ta dut l’ultin secul al à fat cjalt? O vin a pene dite che chest Mai o cricavin di frêt!
Nol jentre, nono, al è un riscjaldament di dute la Tiere, in gjenerâl. I glaçârs a son daûr a disfâsi! E dopo, il mudament dal clime nol puarte nome cjalt, ma ancje tampiestis, fenomens atmosferics spropositâts. I sienziâts a disin che la cause o sin noaltris.
Jo e te? E ce vino fat di mâl? No varaio mighe esagjerât cul spolert? Aio disfat il glaçâr de Mont Cjanine cul fâ masse cjastinis?
No, noaltris doi, nono: noaltris oms, in gjenerâl. Il mudament dal clime al nas dal incuinament, dai gas che o butìn tal aiar, cu la industrie, cu lis machinis, cui arlevaments.
Ancje i arlevaments?
Eh, sì, nono, i arlevaments intensîfs a butin fûr un grum di gas che a son cause dal “efiet sere”. Cu lis “pucis” des vacjis!
Usti! Alore viodistu che o vevi reson e che e je colpe ancje dal vuardi? Soredut se tu lu cusinis cul ardiel e cui fasûi! ❚
