A. Cirulli “Etnoregionalismi”, Firenze, Mondadori Università, 2019
La jessude di “Etnoregionalismi” e je une biele gnove intal cjamp de sagjistiche e de editorie taliane parcè che finalmentri tancje letôrs a puedin provâ a cognossi e a capî almancul alc in cont dai tancj autonomisims, regjonalisims e indipendentisims che a son ator pal continent e ancje inaltrò. Chel di di Adriano Cirulli al è un librut piçul e plen di sostance che al fronte cuistions penzis e impuartantonis in cont des diviersis declinazions dal rapuart jenfri teritori, identitât e politiche che a son la fonde di cetantis rivendicazions, mobilitazions e iniziatiativis.
La publicazion e je un bon vademecum, metût adun cun competence e cence prejudizis (une raritât, in Italie, soredut su argoments di cheste fate), che al ten dongje un biel insuazament teoric gjenerâl, une schirie di resonaments specifics e ducj i sclariments terminologjics e concetuâi che a coventin. Nol è un câs, stant il so autôr, Adriano Cirulli, che al è une vore competent propit su chescj argoments e lu mostre ad in plen, ancje se intune forme sclagne e strucade. Si podarès dî: il libri just tal moment just. ❚
