NO PAR FURLAN… MA BOGNS. Martina Iori, e lis sôs storiis di ‘Amore & Buscofen’ | Ocitanie, cuistion linguistiche e nazionâl

Martina Iori, e lis sôs storiis di ‘Amore & Buscofen’
Nûf cjançons in stât di concuistâ il cûr e lis orelis di ducj: di chei che ur plasin la melodie e di chei che a àn guscj un tic plui dificii, un tic plui rock o folk o jazz o indie. A son chês che si cjatin dentri dal prin disc di Martina Iori, cjantautore ladine fassane che dopo passe doi agns di concierts in Ladinie e inaltrò ator pe Europe, dal Friûl ae Gjermanie e fintremai tal Paîs Basc, e à metût intun cd pinsîrs, peraulis e emozions.
Compagnade di Marco Stagni al liron e di Enrico Tommasini, la zovine cjantante e polistrumentiste (ghitare, ukulele e violin) di Delba di Cjanacei e conferme lis sôs cualitâts di autore e di interprete, che e veve mostrât cun sucès intant dai siei concierts tes sôs esibizions dal vîf.
De sô version dal imni fassan ‘Lo che i pré’ ae version speciâl cuntun cuartet di arcs dal so piçul classic ‘Via con mia musega’ al è dut un biel scoltâ.
Martina Iori, “Amore & Buscofen”, 2016. ❚
Marco Stolfo
_______________________________
Ocitanie, cuistion linguistiche e nazionâl
Nol è mai masse tart par lei un bon libri. Chest al vâl par sigûr par ‘Occitan. Une langue en quête d’une nation’: un libri par francês di une autore taliane che al conte la la lenghe d’oc e la Ocitanie. La publicazion, dade fûr doi agns e mieç indaûr dal IEO (Institut d’Estudis Occitans), e da cont dai studis fats di Francesca Zantedeschi intant dal so dotorât di ricercje alì dal Istitût universitari european di Florence.
Il libri al conte il dibatiment in cont de lenghe ocitane vie pal Votcent, i studis linguistics e leteraris e il storic antagonisim tra centri e periferiis dal ‘Hexagone’, tra nord e sud e tra tieris e lenghis d’oc e d’oil: tant a dî tra Ocitanie e France.
Francesca Zantedeschi e fronte la evoluzion e il potenziament dal stât nazionâl francês, la alteritât ocitane, lis rivendicazions culturâls e linguistichis che a deventin alc altri, tra istancis regjonalistis e visions plui o mancul claris di Ocitanie e di nazion ocitane.
Francesca Zantedeschi, “’Occitan. Une langue en quête d’une nation”, cIEO, Tolose, 2013. ❚
M.St.