La Sardegne e il mont di Dr. Drer & CRC Posse
A son passâts 26 agns di cuant che a àn tacât a sunâ, ma i sarts Dr. Drer & CRC Posse a àn ancjemò cetant ce dî e ce fâ. Si viôt cun Cabudanni, il lôr album gnûf saltât fûr cuatri mês indaûr: une “rieste” di 11 tocs là che si incrosin hip hop, raggamuffin e tant altri. I tescj des cjançons – fale Il treno e Palestina par talian – a son in lenghe sarde, in linie cu la tradizion dai «arrepadoris de Casteddu», che a tornin a contâ e a cjantâ la Sardegne e il mont cun snait e cun passion, tra i rivocs r’n’b de cjançon che e da il titul al album, chei folk di S’Acentu, chei punk di Murra, l’eletroniche di In Domu e Su Palu, la biele version reggae e par sart de L’estaca, storic imni antifranchist e catalanist di Lluis Llach.
Dr. Drer & CRC Posse, ‘Cabudanni’, 2017.
La zone di confin di un autôr cence confins
Scritôr, sagjist, pitôr, poete e inteletuâl a 360 grâts, Tito Maniacco al à un puest impuartant te produzion di culture e di pinsîr in Friûl de metât dal Nûfcent incà. Al è muart ai 22 di Zenâr dal 2010, ma la sô vôs, lis sôs visions e lis sôs ideis a vivin ancjemò. Chest nol vâl dome pes tantis oparis publicadis in vite, ma ancje pai tescj che a tachin a viodi la lûs publiche pe prime volte dome cumò. Al è il câs, pe narative, des dôs contis lungjis ineditis, La figlia del re degli elfi e Non si sa. Metudis dongje cun atenzion e cun rispiet di Bottega Errante tal libri La zona di confine, jessût di resint par cure di Angelo Floramo, a son doi esemplis di scriture culte e inzirlose.
Tito Maniacco, ‘La zona di confine’, Bottega Errante, 2017.
di Marco Stolfo
