Sfuei Mensîl Furlan Indipendent
Archivi de Patrie

No al comissionament de Stazion di scambi e Interpuart di Çarvignan

............

Viers il 2010 e comence, par opere di Trenitalia, une operazion par sierâ in maniere pilotade la stazion di scambi. Une struture che tal 2008 e spartive – a disin – sù par jù 30.000 cjars al mês, cjapant dentri ancje i vueits, e ven ridimensionade ae fin dal 2012, a dome 5.000 cjars al mês. Cussì, a son lâts ben plui in là dai efiets de crisi industriâl e cence un segnâl di disapont di bande de politiche. La ocupazion te stazion di scambi e ven ridusude di 400 a 150 unitâts. Di chê strade, la Regjon e propon ca e là gnûfs interpuarts ancje cun obietîfs ambiziôs. Par esempli, la gnove stazion di scambi dal interpuart di Pordenon (tal imprin  instradade di Trenitalia) che e lavorave za sù par jù un miâr di cjars. Intant, lis stazion di scambi di Feistriz in Carinzie (che e rapresente la seconde stazion di scambi austriache) e chê di Sesana in Slovenie, a dispartissin e a tratin i convois al puest di Çarvignan, da e pal nord est european e pe Italie, cuistant ancje il lôr puartesfueis clients.
La politiche e declarave al moment de inaugurazion, tal lontan Fevrâr dal 2000: “la stazion di scambi e l’interpuart Alpe- Adria di Çarvignan, prefissant di costituî il centri regjonâl de intermodalitât e no dome dal FVJ, al rapresente un pont di riferiment pal trafic des marcjanziis tal nord est talian e un centri nevralgjic di colegament fra la penisule e i Paîs de Europe nord orientâl.”
Chest “centri regjonâl” de intermodalitât e de logjistiche – daspò un invistiment al valôr di vuê che si dîs di cirche trê cuarts di miliart -, savoltât des direzions operativis di Trenitalia e di zelosiis, al risulte che tal 2013 al lavori dome al 10% de sô potenzialitât. Dai implants di Çarvignan, onerôs pal contribuent, vuê e je restade dome une modeste olme de Plateforme logjistiche regjonâl: si fevele di unitâts che a serviressin dome la  aree industriâl dal Ausse-Corno. A son emerzudis intant in regjon dôs direzions tal setôr, chel de intermodalitât difondude, e chel de concentrazion de maiorance dai invistiments e de operativitât intun sôl interpuart, e – stait a scoltâ – a Fernetti e no a Çarvignan. Si tirin fûr, tant che motivazions, fai di struturazion dai implants in maniere assolude inesistents e problemis par causis dal puart specific di Triest. Il front dal decomissionament di Çarvignan no si è nancje inacuart che a Fernetti al va tutelât il delicât sisteme naturalistic dal altiplan dal Cjars e un maraveôs paisaçs. Cun di plui, di chê altre bande dal confin, al è l’interpuart e la stazion di scambi di Sesana, nol è il câs di ripeti il dissipament ambientâl al di là di chel industriâl za fat te Basse.
O stimìn che al vadi ricostruît in regjon un dissen logjistic cul rilanç de stazion di scambi e interpuart di Çarvignan par prin, viodût che al è metût propit ae confluence di doi Coridôrs Europeans, e prossim aes zonis  industriâls regjonâls e ai puarts, che le rindin adate ancje aes funzions di retripuart, come a Rivalta Scrivia a Padue. E je ore che il guvier regjonâl al vierzi une vertence cence sudizions cul Ministeri dai traspuarts e Trenitalia. Cumò cheste ultime e declare di vierzisi ancje tal invistiment dal traspuart marcjanzie: si presentin  alore spazis di tornâ a contratazions par un rûl che al à di tornâ di dimension nazionâl e internazionâl. Recuperant chest contest, nol sarà dificil tornâ a motivâ ancje l’invistiment dal privât viers struturis grandononis, che no van lassadis deteriorâ, tornant a puartâ ae ativitât une strumentazion logjistiche che e sedi ae altece  de vocazion e posizion gjepolitiche de Regjon. ❚
Zuan Carli Castellarin, Comitât pe Autonomie e il Rilanç dal Friûl

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +