Sfuei Mensîl Furlan Indipendent
Archivi de Patrie

Il vison american, une gnove specie esotiche che e vîf in Friûl

Gianluca Rassati
Il Vison american

Une necessitât dal om, stant che al è crot, e je chê di cuvierzisi. In tal timp, però, cheste “cuviertidure” di necessitât e à cjapât ancje altris significâts: al baste pensâ aes divisis che a mostrin la apartignince a “alc” tant che a un esercit, un cuarp militâr ma ancje un associazion, un grup e vie indenant. A chel significât al è peât un altri: chel di indicâ il status di une persone. Lis pelicis di diviers animâi a àn vût intal timp ancje chest significât ca, dutun cul desideri di someâ biei, creant un messedot che al à fat stimâ che il vistîsi cuntune pelice al imbielìs la persone e le fasès aparî inmagante, impuartante, di valôr ai voi di chei che le cjalavin, daûr dal principi che “la vieste e fâs il frari”, al contrari dal mût di dî talian che ducj o cognossìn.
◆ L’om, par lâ daûr ai siei istints e ai siei plasês, che a son ae fonde des modis, nol esite a doprâ altris animâi a so gust e a fâ di lôr ce che al calcole miôr. Intal timp, par otignî lis pelicis in mût plui facil e par stâ daûr ae domande, si à tacât a arlevâ i animâi. Chest – soredut di cuant che la sensibilitât, almancul di cualchidun, pe vite di chei altris vivents e je aumentade – al à creât problemis ai arlevadôrs, intal sens che, dentri di grups clamâts “ambientaliscj”, cualchidun al à pensât di agjî par chel che al stimave che al fos il ben dai animâi, lant a liberâju.
◆ Une azion di chest gjenar e je stade fate di un grup animalist inte gnot fra i 30 e i 31 di Avost dal 2003 cuant che, di un arlevament dongje Divilin (Vile di Cjargne) a son stâts liberâts cirche 3400 individuis di vison american Neovison vison.
Il vison american al è un mamifar semiacuatic origjinari dal Nord de Americhe. Intal secul XX al è stât impuartât tant che animâl di pelice in diviers paîs, e cumò si cjatilu in Europe, Asie e Sud Americhe. In Friûl, in passât a sono stâts metûts sù diviers arlevaments di indulà che a son scjampâts o che a son stât liberâts individuis.
◆ Intai dîs dopo de liberazion, al è stât recuperât un miâr di animâi e dopo altris 400; chei altris si son dispierdûts, tant che po dopo a son stâts viodûts o cjatâts muarts in diviersis localitâts, e intun pâr di mês a son stâts contatâts a passe 50 km dal pont di liberazion e su diviersis monts ancje sore dai 1500 m di altitudin.
◆ In cualchi câs, la sveltece di dispersion e somee che e sedi stade favoride dal spostâsi midiant di machinis, camions e altris mieçs dulà che i animâi a jentravin dentri di scuindon.
◆ La plui part dai esemplârs liberâts no à passât l’Invier, ma contats si son vûts in ambients adats ae specie tant che il Lât di Cjavaç, ancje inte Vierte dal 2004.
◆ In ciertis cundizions, cuant che a vegnin imetûts in nature individuis di une specie esotiche tant che il vison american, chescj a puedin cjatâ ambients adats e cundizions justis pe riproduzion. Cheste evenience e je stade stimade pussibile graciis aes osservazions, e par vie che a son stâts cjatâts individuis muarts in diviersis localitâts intai agns dopo dal 2004.
◆ Par confermâ cheste ipotesi, tignint in considerazion lis carateristichis e lis preferencis ambientâls de specie, l’autôr al à metût adun un studi che al è stât fat dilunc dai cors di aghe plui dongje dal pont di liberazion: il Tiliment e il Dean. A chescj, si è zontât il Melò, che si cjate dongje dal Lât di Cjavaç.
In particolâr, a son stâts esaminâts trats dai trê cors di aghe dulà che si stimave che e fos plui pussibilitât di contat cu la specie: intal Tiliment la zone di Caprizi, intal Dean la alte val, e intal Melò a soreli a mont di Trasaghis.
◆ La indagjin e je stade fate doprant fototrapulis, cirint i animâi e lis olmis de lôr presince. A chest monitorament al è stât zontât un altri di gjenar estensîf che al à interessât altris cors di aghe.
I risultâts a àn confermât in buine part ce che al jere stât ipotizât.
Inte Val dal Tiliment, il vison al è stât cjatât de dighe di Caprizi par cirche 3 km dilunc dal flum, viers For Disot e intal Riu di Grasie.
◆ Inte Val dal Dean, la specie e je risultade presinte intun toc di passe 10 km di Rigulât insù, fintremai plui insù de confluence dal riu Bordalie e intal riu Agalene. Esemplârs a son stâts viodûts ancje intal toc dal Dean che al passe par For Davôtri. Intal Melò, invezit no son stâts contats cul vison.
◆ Il studi al à permetût, pe la prime volte intal setôr setentrionâl dal Friûl, di individuâ dôs popolazions dal sigûr autonomis dal pont di viste de riproduzion. Stant che intai ultins timps no son stâts metûts sù arlevaments, al è une vore probabil, par no dî cuasi sigûr, che lis dôs popolazions si sedin origjinadis dai individuis liberâts dongje Divilin intal 2003.
◆ Stant che dopo de liberazion i individuis si son sparniçâts “a svintule”, cemût che al è stât verificât dai dâts cjapâts sù sul teren, e jere stade considerade la pussibilitât de esistence di altris popolazions dilunc altris cors di aghe: a confermâ chest a son stadis lis osservazions fatis intal monitorament estensîf dilunc de Bût e de Plâf (ancje in Venit). La ultime popolazions salacor si è origjinade di chê de alte Val dal Dean, che e je la plui setentrionâl in Italie.
◆ La presince di une gnove specie e pues fâ crodi che chest al sedi un miorament, ma intal câs di une specie esotiche tant che il vison american al nas cualchi probleme. Di fat, chel al pues jentrâ in competizion, par vie de vicinance di nicje ecologjiche, cu la lodre Lutra lutra (che e je tornade a frecuentâ, dopo desenis di agns, la zone dal Dean dulà che al vîf propit il vison, come verificât dal autôr di diviers agns incà) e il morson o spuç Mustela putorius. Cun di plui, si nudrìs di diviersis speciis di mamifars, uciei, retii, anfibis, invertebrâts e su chei al pues vê un grant impat, tant che, di solit, prin che l’animâl al cjapi pît, si considere la pussibilitât di eliminâ lis popolazions.
◆ Su la fonde dal fat che la introduzion di speciis estraniis che a son in stât di adatâsi al ambient e di formâ popolazions stabilis e cree diviers problemis e, intal câs dal vison american, chest al à un impat su lis speciis autoctonis (ven a stâi chês che si cjatin naturalmentri intune aree), si à di tignî cont di diviers fatôrs.
◆ Prin di dut e va dineade la pussibilitât di meti sù arlevaments e, par chei che a son za, bisugne previodi misuris par che i animâi no scjampin. In chest ultin câs, e in câs di liberazions dovudis a sabotaçs, al varès di jessi un plan pal recupar dai animâi cun scuadris di pront intervent.
◆ Dopo, fevelant in gjenerâl di speciis esotichis, bisugne vietâ la lôr importazion. Chest al evite la muart e la soference soredut dai individuis di chês speciis che a son caturadis intal lôr ambient naturâl e obleadis a fâ viaçs ancje di miârs di chilometris, dispès in cundizions di grant malstâ. Cun di plui, chei individuis che a rivin a destinazion, ju spiete la presonie e in diviers câs di jessi copâts.
◆ Si varès, ancje – prin di fâ ciertis azions, pûr sburtadis di “sintiments” che a vegnin di une vision mancul antropocentriche – di valutâ lis consecuencis, parcè che si pues fâ dam al ecosisteme.
◆ Naturalmentri, par podê svicinâsi in maniere razionâl ae cuistion, si à di rivâ a dominâ i istints e i plasês che nus fasin crodi che, se alc nus plâs, o podìn cjolisal, nol impuarte il dam che o fasìn – ancje a nô stes – e la soference e la muart che o provochìn.
◆ Il discors al sarès une vore grant e complicât ma, fasint une sintesi estreme, al mancje un toc: par vê un svolt inte cuistion, al è necessari e doverôs che cui che al stabilìs la normative di setôr e cui che le apliche si cjapi sù, propit par leç, la responsabilitât des consecuencis che chê normative e prodûs e che, a colade, ducj i “atôrs” – dal cumierç, al arlevament e vie indenant – a sedin responsabii di ce che lis lôr azions a produsin. Par fâ capî invezit cemût che e je tignude in considerazion la “facende” – e par esempli la pericolositât che al pues vê l’ent public pal ecosisteme – al è necessari ripuartâ il fat che, timp indaûr, un ent public al proponeve la realizazion di arlevaments di vison american in zonis di mont. ❚

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +