MUSIS DI…FACEBOOK. Pai Gnognosaurs

La Patrie dal Friûl e je aromai passe di un an che à inviât la sô pagjine Facebook. Un imprest par difondi il gjornâl, ma ancje par incuintrâ e dialogâ cui letôrs e cu la int che e baline pal social network. E cussì al capite di incuintrâ cualchi realtât interessante…
✽✽✽
A son gnognos e ju cognossin, ma chest Istât invezit di lâ in feriis i Gnognosaurs a son cjapâts su plui fronts, dì par dì. La ultime, pal moment, ju viôt impegnâts tal insert estîf dal Messaggero Veneto cuntun striche cuotidiane che e presente lis lôr “Origjins”. Ma za di timp a son rivâts su Facebook cuntun lôr profîl che di cualchi timp al è stât trasformât intune pagjine istituzionâl che in pocjis setemanis e je rivade a passe 3000 like (i “Mi piace”).
Nol è stât facil (dopo dut, lu ripetìn: a son gnognos), ma ju vin contatâts e, prin un e dopo chel altri, o vin cirût di sintîju ducj par fâsi dâ cualchi rispueste.
Facebook e Gnognosaurs: no volarêso mighe dînus che za tal Jurassic al jere un Zuckensaur?
Al rispuint il professôr Einsaur: “Jo i Social ju vevi inFentâts za te preistorie. Si clamave Pterobook, ma si pierdeve masse timp daûr di cheste robe e lu vin molât. Dopo o sês rivâts di gnûf voaltris che come gnognos o continuais a pierdi timp mateant par oris e oris cun chescj imprescj”.
Curtis e che si tocjin: cui isal di voaltris che al gjestìs la pagjine Facebook?
E rispuint Ines “Jo le dopri par cirî morôs”… Al interven Bombo “Jo invezit o soi specialist pal foodblogging”… e siere Mami “Jo o fâs zuiâ i fruts cun Farmville”…
Cemût si fasial a stâur daûr a passe 3000 fan?
Al rispuint Rugne, il tiranosaur “Jo ur stoi daûr ben vulintîr: plui a son e miôr al è”! E si leche i lavris, riduçant…
Ma par dinosauruts furlans come voaltris ce vuelial dî vignî fûr suntun Messaggero Veneto?
Al rispuint Momo “I gjornâi dai nestris timps a jerin: Le Monde Jurassic, Il Corriere della Saura e il New York Saur. O sês voaltris furlans che o sês cussì gnognos che si contentais di un Veneto… Noaltris o vin vût di adatâsi”.
Ce vino di spietâsi ancjemò di chest Istât cussì impegnatîf?
Al rispuint Martin “Impegnatîf par cui? Visaitsi che o sin dinosauruts furlans usâts a movi il poleâr. O viodarês ce che o vin preparât pal Autun: lait indevant a stânus daûr e visaitsi che dutis lis anticipazions o podarês leilis su la nestre pagjine Facebook”. ❚
Christian Romanini